HAAL ETILEEN UIT VERPAKKING VIR BETER RAKLEWE
Tegnologie wat die rypwordingshormoon etileen uit die verpakking van vars produkte kan “verwyder”, kan dien as ’n goeie teenvoeter vir die kort onderbrekings wat soms in die koueketting voorkom en vrugte en groente se rakleeftyd drasties verkort.
“Mense eet ál meer sagte vrugte, maar in ’n onlangse studie het 32% mense gesê hulle eet nie al die bessies wat hulle koop nie. Sowat 94% het gesê die bessies het sleg geraak voor die “beste voor”-datum,” het dr. Chris Bishop, hoof van die ná-oes-eenheid aan die universiteitskollege Writtle in Brittanje, tydens die tweede ná-oes-innovasiesimposium op Stellenbosch gesê.
“Ek sê altyd ’n verbruiker eet nie vars produkte terwyl hulle in die supermark is nie, daarom eindig die koueketting nie daar nie.
“Verbruikers moet eintlik aangemoedig word om geïsoleerde inkopiesakke te gebruik.”
Bishop het twee bakkies aarbeie saam met 1 kg-sakkies baba-aartappels, appels en wortels by die Britse supermark Tesco gaan koop, dit in sy kattebak gesit en die kort afstand na sy kantoor gery. Hy het temperatuur-opskrywers (loggers) in die bakkies aarbeie gesit.
“Die lugtemperatuur in die bakkies het vinnig van 8 °C tot 20 °C gestyg.
“’n Huishoudelike yskas moet meer energie gebruik om die vrugte af te koel. Teen hoër temperature is die vrugte ook meer vatbaar vir siektes.”
Hoewel Britse supermarkte deesdae yspakke en geïsoleerde sakke beskikbaar stel, sê Bishop ’n ander opsie is om etileen-reinigers, soos It’sFresh!, te gebruik.
Hierdie velletjies verwyder die rypwordingshormoon etileen uit die lug. Sodoende word voortydige aftakeling en vermorsing gekeer. Dit verhoog ook die produkte se natuurlike siekteweerstand en is heeltemal veilig vir voedsel.
“As jy etileen kan verwyder tydens botritis se ontwikkelingsiklus, vertraag dit die verskyning van botritis,” sê Bishop.
“Ons het 7 500 bakkies aarbeie oor 12 weke getoets en dit maak beslis ’n verskil. Dit vertraag en onderdruk siektes.
“Baie supermarkte gebruik dit om aan hul verbruikers ’n langer raklewe te gee, maar die verliese is ook nie so groot indien daar klein temperatuur-onderbrekings is nie.”
Volgens Bishop kan die etileenreinigers ook gebruik word om te keer dat aartappels uitloop.
Dis ook nuttig vir avokado’s, pere en steenvrugte in die kleinhandelaarsverpakking of vervoerkartonne.
“Dit verleng die gehalte, dra by tot produklewe en verminder vermorsing, hoewel dit ekstra koste en arbeid verg.” – LUCILLE BOTHA