WEER PIESANGVIRUS SÓ VAN JOU PLAASHEK
Dit is uiters belangrik dat piesangboere net virusvrye materiaal plant om die verdere verspreiding van die gevreesde piesangbossiekte (banana bunchy top virus, of BBTV) te voorkom.
Dr. John Robinson, bekende piesangkonsultant, sê net weefselkultuur wat oor ’n virus-indeks van ’n gesertifiseerde laboratorium beskik, moet geplant word.
“Ongesertifiseerde suiers moet onder geen omstandighede geplant word nie, want daar is geen manier om seker te maak dat hierdie ‘tweedehandse’ plantmateriaal virusvry is nie. Dít kan slegs deur sertifisering bevestig word,” verduidelik hy.
Die virus is laat verlede jaar aan die KwaZulu-Natalse Suidkus naby Hibberdene op ’n piesangplaas opgespoor, en bring Suid-Afrika se hele piesangbedryf in die gedrang. Dit word deur die piesangplantluis (Pentalonia nigronervosa) versprei.
“Die grootste uitdaging is om te verhoed dat die virus by jou plaas intrek. Teen die tyd wat sigbare simptome gewaar word, is die virus minstens al weke, maar heel moontlik al maande, in jou omgewing.
“Daar is nie ’n manier om die virus binne-in besmette plante dood te maak nie. Dit kan net bestuur word in die gebied waar dit voorkom – indien die besmetting raakgesien word. Die beste raad is om van alle bome met simptome ontslae te raak, maar dit is moontlik dat die virus in plante is wat nog nie simptome begin wys nie, wat verseker dat die virus voortleef.
“Om dus te voorkom dat besmetting plaasvind, moet daar ’n goed gekoördineerde poging van alle betrokke partye wees om verspreiding te stuit,” verduidelik hy.
In 2010 het Landbouweekblad berig dat die BBT-virus reeds in Zambië groot skade berokken, en dat dit ook in Mosambiek gewaar is.