SÓ OORLEEF DIE VIRUS
BBTV kom in die floëem van die piesangplant voor, verduidelik dr. Elize Jooste van die Landbounavorsingsraad.
Daar is ook ander gasheerplante wat deur die virus besmet kan word, soos gemmer, ornamentele piesangs, taro en Strelitzia-spesies.
Besmette piesangplante se krone sal misvormde blare hê, en hoewel besmette plante nie dikwels vrugte dra nie, sal die vrugte misvorm wees indien daar enigsins vrugte is.
Die virus kan tot twee weke in die plantluis virulent bly. Wanneer die luis op piesangplante voed, kan die virus binne 15 minute van die luis na die plant oorgedra word.
Die virus versprei daarna deur die hele plant, en die suiers wat op hierdie plante ontwikkel en die volgende seisoen se oes moet lewer, sal
ook besmet wees en dus niks werd wees nie.
Die virus is nie grondgedraag nie, en waar besmette plantasies uitgeroei is, kan nuwe
plantasies weer gevestig word sonder die risiko van besmetting deur die grond.
Wat wel ’n risiko inhou, is agtergeblewe plantmateriaal en wortelreste wat as infeksiebron kan dien as plantluise teenwoordig is. Daarom moet die besmette gebied vir ’n tyd braak lê voordat daar weer piesangs geplant kan word.
Omdat simptome van besmetting eers ná ’n maand begin sigbaar word, is dit bykans onmoontlik om alle besmette materiaal uit ’n area te verwyder as dit eers besmet is.
Prof. Altus Viljoen van die Universiteit Stellenbosch se departement plantpatologie sê die Australiërs kry dit reg om, teen koste, besmette gebiede weer virusvry te kry. Besmette plantmateriaal word dan met wortel en tak uitgeroei en die plantluis streng bekamp.