VOORUITGANG DANKSY WETENSKAP

Mnr. Mecki Schneider en sy vrou, Brigitte, boer met wit Brahmane en Simmentalers op die plaas Okamutombe digby Grootfontein in die noorde van Namibië, asook op ander plase.

Hulle het ook ’n groot, kommersiële kudde vir osproduksie vir die vleisuitvoermark na Europa en ander lande.

Mecki het ná matriek die grade B.Sc. en M.Sc. in elektriese ingenieurswese aan die Universiteit van Kaapstad verwerf, met die klem op toegepaste wiskunde en fisika.

Daarna het hy by die Nasionale Versnellingsentrum van die Wetenskaplike en Nywerheidsnavorsingsraad (WNNR) in SuidAfrika gewerk waar hy ’n lewensvatbaarheidstudie gedoen het vir die bou van ’n nasionale deeltjieversneller; ’n masjien wat atome tot uiters hoë energievlakke en intensiteite versnel vir kernnavorsing, toepassings in mediese terapie en die vervaardiging van isotope vir nywerheidsgebruik.

Hy moes kies tussen ’n loopbaan as wetenskaplike (hy het hom toe reeds vir ’n doktorsgraad ingeskryf) en boerdery. Boerdery het gewen en hy het die familieboerdery in 1986 by sy pa, Gottfried, oorgeneem.

Hoewel hy ’n belowende loopbaan as wetenskaplike vaarwel toegeroep het, het dié ontledende grondslag hom in staat gestel om van die begin af wetenskaplik te boer.

Mecki is met soetveld geseën; ’n goeie mengsel van verskeie wenslike grasspesies, soos swartvoetjie (Brachiaria nigropedata), borseltjiegras (Anthephora pubescens), bloubuffelgras (Cenchrus ciliaris), buffelgras (Panicum maximum), sandkweek (Schmidtia pappophoroides), smutsvingergras (Digitaria eriantha )en Eragrostis.