UNIEKE BOUPANELE
’n Nuwe, sterk boukonsep wat duursaam dog goedkoop is, is binnekort in Suid-Afrika beskikbaar. Dit bestaan uit voorafvervaardigde panele en is ideaal vir werkersbehuising. Daarbenewens kan dit ook op talle ander maniere op plase en in dorpe aangewend word om geboue vinnig op te rig.
Mnr. Etienne Jacobs van die maatskappy Water Berry Trading 44 in Somerset-Wes, wat dit bemark, sê die panele – bekend as WBT Rocktec Panel – bestaan uit liggewig, dog uiters sterk “sandwich”-panele wat vervaardig word onder streng internasionale ISO-gehaltestandaarde. Dit ondergaan tans ’n goedkeuringsproses by Agrément SA, hoewel dit wêreldwyd reeds in lande soos Australië, Kanada en Brittanje goedgekeur is en op groot skaal opgerig word.
Die panele is geskik vir buite- en binnemure wat die dakstruktuur kan dra en/of ondersteun. “Ook omdat dit maar sowat ’n kwart van die gewig van ’n normale enkelsteenmuur is, behoort dit boukoste af te bring wat tyd en arbeid betref,” verduidelik Etienne. “Dit is baie maklik om op te rig en ’n werker kan sowat 25 m² se panele per dag oprig – aansienlik vinniger as normale boumetodes met boustene of boublokke.”
Die droë bouproses met ’n gladde afwerking is geskik vir enige finale afwerking. Die tong-en-groef-panele kan opgesny word in verlangde afmetings en aan mekaar gekoppel word volgens ontwerp en behoefte.
Die afmetings van standaardpanele is 75 mm (dikte), 600 mm (breedte) en 2 400 mm (hoogte).
“Die veel dunner mure gee 5-10% meer ruimte in ’n vertrek omdat steengeboude mure dikker is. Dit verskaf ’n oplossing vir vinnige gehaltebehuising vanaf laekoste tot topklas, sowel as by skole, opbergingsgeriewe en werkswinkels.”
Die paneel van 75 mm dik weeg sowat 63 kg, het ’n druksterkte van sowat 7 MPa, is waterdig, het goeie akoestiese en termiese eienskappe, en is vuurvas tot twee uur sonder om enige giftige gasse vry te stel of sy isolasie te verloor. Die panele bestaan uit kante van veselsement, wat elk 5 mm dik is. Die binnedeel bestaan uit liggewigbeton – dus warm in die winter en koel in die somer.
Die panele is 100% asbes- en sepiolietvry en bestand teen insekte en alge-groei. Sonlig of stoom het geen uitwerking op die panele nie. Etienne sê dié eienskappe maak die panele omgewingsvriendelik en herbruikbaar.
Dit bied ideale boumateriaal vir gebruik op die plaas, dorp of stad. Wanneer die goedkeuring deur Agrément SA afgehandel is, sal die produk beskikbaar wees vir verspreiding in Suid-Afrika en buurlande.
Prys: Die panele word direk ingevoer uit China. Pryse is onderhewig aan die wisselkoers, invoertariewe en die grootte van die panele. NAVRAE: Etienne Jacobs, sel 072 618 4968. John Smith, e-pos: wbtrocktec@johnsmith.co.za.