Hou ’n somerbraai
Vir die kosskrywer Vickie de Beer is daar niks so lekker soos om saam met vriende en familie om ’n etenstafel te kuier nie. Hier is haar vars idees vir ’n ontspanne somerbraai.
Waatlemoen-en-garnaalslaai Dié vars, ligte slaai is somerkos op sy beste! Slaai
15 ml gerasperde gemmer
■ 15 ml fyngekapte knoffel
■ 15 ml fyngekapte brandrissie
■ 80 ml olyfolie
■ 20 garnale, skoongemaak
■ Halwe waatlemoen
■ 5-6 sprietuie, oorlangs gesny
■ 125 ml geroosterde grondboontjies, gekap
■ 125 ml gekapte koljanderblare
■ Hand vol kruisementblare ■
Slaaisous
60 ml olyfolie
■ 10 ml sojasous
■ 15 ml soet rissiesous
■ die sap van 1 lemmetjie ■
Roer die gemmer, knoffel, brandrissie en olyfolie deur die garnale en laat marineer vir 1 uur. Verhit ’n pan oor hoë hitte en braai die garnale in die marinade-olie tot helderpienk en ferm. Sny die waatlemoen in happiegroot skywe en rangskik dit op ’n bord. Stapel die garnale bo-op en strooi die sprietuie, grondboontjies en koljander- en kruisementblare oor. Meng alles vir die slaaisous saam en geur met sout indien nodig. Sit die slaaisous voor met die slaai. Lewer 8-10 porsies.
Mexikaanse worsslaai
750 g boerewors
■ 2 mielies
■ 200 g kersietamaties, gehalveer
■ 1 rooi ui, baie fyn gekap
■ 1 avokado, in blokkies gesny
■ 6-8 klein komkommers (of ’n halwe groot
■ komkommer), in repies gesny Hand vol koljanderblare
■ Hand vol kruisementblare
■ Sout en peper na smaak
■ 45 ml olyfolie
■ Die sap van 1 lemmetjie of suurlemoen
■ Suurroom, vir opdiening
■ Lemmetjiewiggies, vir opdiening ■
Braai die heel, opgerolde wors en die mielies oor matige kole. Sny die mielies van die stronk af en meng met die res van die bestanddele, behalwe die olyfolie en lemmetjiesap. Sprinkel die olyfolie en lemmetjieof suurlemoensap oor. Skep die slaai op die rol wors en sit voor met groot lepels vol suurroom en lemmetjiewiggies. Lewer 8-10 porsies.
Gebraaide lamsrib met chimichurri
Chimichurri is ’n Argentynse sous wat gewoonlik saam met geroosterde vleis bedien word. 60 ml olyfolie
■ die skil van 2 suurlemoene
■ 4 knoffelhuisies, fyn gemaak
■ 1 groot lamsrib
■ 4 halwe suurlemoene (gebruik sommer dié
■ waarvan jy vroeër die skil gerasper het)
Chimichurri
300 g kersietamaties, opgesny
■ 1 rooi ui, fyn gekap ■
3 knoffelhuisies, fyn gemaak
■ Groot hand vol pietersielie, gekap
■ 5 ml rissievlokkies
■ 5 ml paprika
■ 5mlfynkomyn
■ 1 lourierblaar, gekap
■ 80 ml olyfolie
■ 60 ml rooiwynasyn ■
Meng die olyfolie, suurlemoenskil en knoffel en vryf die rib daarmee in. Laat staan vir 30 minute.
Meng al die chimichurri-bestanddele goed en hou eenkant. Sit die halwe suurlemoene saam met die vleis op die rooster. Braai die rib met die beenkant ondertoe vir 15 min., draai dit om en braai dan die vetkant vir 15 min. stadig oor matige kole. Hou dit heeltyd dop en draai die rib om as die vet vlam vat.
Braai die rib so tot gaar, terwyl jy dit gereeld omdraai sodat die vet uitbraai. Druk die suurlemoensap oor die rib uit en sit voor met die chimichurri-sous. Lewer 8-10 porsies.
Braaimielies met rissiebotter en sesamsaad
125 g sagte botter
■ 1 knoffelhuisie, fyn gekap
■ 5 ml paprika
■ 10 ml rissievlokkies
■ Groot hand vol koljanderblare, gekap
■ Knippie sout
■ 10-12 mielies
■ 125 ml lig geroosterde sesamsaad ■
Meng al die bestanddele behalwe die mielies en sesamsaad. Braai die mielies oor matige kole tot gaar en smeer heeltyd van die rissiebotter aan. Rol die warm mielies in die sesamsaad en sit voor met die orige rissiebotter. Lewer 8-10 porsies.
Geroosterde-soetrissie-enboneslaai
6 middelslag-soetrissies, middeldeur gesny en ■ ontpit 30 ml olyfolie
■ Sout na smaak
■ 1 rooi ui, in ringe gesny
■ 410 g (1 blik) cannellinibone, gedreineer en
■ afgespoel Hand vol koljanderblare
■ Hand vol basilieblare
■ 6-8 jalapeño-rissies, in ringetjies gesny ■
Slaaisous
60 ml olyfolie
■ Sap van 1 lemmetjie of suurlemoen
■ 10 ml fyngemaakte knoffel ■
5 ml heuning
Voorverhit die oond tot 200 °C. Pak die halwe soetrissies op ’n bakplaat, besprinkel met olyfolie en rooster vir 25 minute tot sag. Geur met sout. Sit die soetrissies in ’n slaaibak en pak die uieringe, cannellinibone, koljander, basilie en jalapeño-rissies bo-op. Meng al die slaaisousbestanddele en sit saam met die slaai voor. Lewer 8-10 porsies.