TALLE VEE VREK VAN WURMS

GROOT getalle beeste en kleinvee is reeds hierdie somer met erge inwendige parasiete gediagnoseer en vrektes het voorgekom. Sedert wydverspreide reën in groot dele van Suider-Afrika begin val het, word sulke gevalle toenemend by veeartse aangemeld.

Veral haarwurms neem toe by vee en verg boere se nougesette aandag om verdere vrektes te voorkom, volgens die Oktober-verslag van die Herkouerveterinêre Vereniging van Suid-Afrika (Ruvasa).

Dr. Faffa Malan, bestuurder van RuVasa, het in dié maand 123 verslae van veeartse ontvang oor veesiektes en parasiete wat voorgekom het.

Malan sê kliniese tekens van erge wurmbesmetting is bloedarmoede (uitgeken aan bleek slymvliese), kwakkeel, gewigsverlies en maagwerking.

’n Veearts kan help om die omvang van besmetting deur middel van ’n miseiertelling te bepaal en aan te beveel watter middels die beste vir ontwurming in die betrokke omgewing is.

BAKTERIESE SIEKTES

Verskeie bakteriese siektes is aangemeld. Veral brucellose verg veeboere se volle aandag. Raadpleeg ’n veearts oor ’n omvattende inentingsprogram.

UITWENDIGE PARASIETE

Alle bosluise neem nou toe, met veral bloubosluise wat hoogty vier en in ál nege provinsies aangemeld is. Bosluise dra siektes, soos Afrika- en Asiatiese rooiwater, hartwater, galsiekte en knopvelsiekte, oor. Inenting sal baie daartoe bydra om dié siektes te bestry.

INSEKOORDRAAGBARE SIEKTES

Sekere siektes word deur insek- te oorgedra, soos knopvelsiekte wat in Mpumalanga, Noordwes, die Vrystaat en KwaZulu-Natal aangemeld is. Dié siektes kan met inentings grootliks in toom gehou word.

GESLAGSIEKTES

Nuwe gevalle van trigomonose word elke maand aangemeld en die siekte woed steeds buite beheer voort. Boere moet seker maak hulle koop bulle slegs by boere wat behoorlike bioseker- heid toepas en elke jaar hul bulle vir geslagsiektes laat toets. Dié maatreëls sluit sterk, heel lyndra- de en hekke in sodat besmette bulle nie kan draadspring nie. Dit is raadsaam dat groepe boere, soos studiegroepe, saam die nodige voorkomende en bekam- pingsmaatreëls toepas.

VIRUSSIEKTES

Daar is nie behandeling teen virussiektes nie, maar diere behoort voorkomend ingeënt te word teen virussiektes wat moontlik kan voorkom.

Daar is egter nie tans ’n entstof teen die gevaarlike siekte snot- siekte nie. Gesels met ’n veearts vir die beste raad.

Boere moet seker maak hulle koop bulle slegs by boere wat behoorlike biosekerheid toepas.