NKWINTI POS SY DG
MNR. MDU SHABANE (BO), direkteur-generaal van Landelike Ontwikkeling en Grondhervorming, is geskors.
Die afgelope ruk het mnr. Gugile Nkwinti, Minister van Landelike Ontwikkeling en Grondhervorming, se frustrasie duidelik na vore gekom oor senior amptenare wat nie hul vinger op die pols het van projekte en wetgewende voorstelle van die departement nie.
Na verneem word, hou Shabane se skorsing verband met prosedurele tekortkominge oor sommige grondhervormingsprojekte van die departement.
Me. Linda Page, woordvoerder van die departement, het bevestig dat Shabane se skorsing nie verband hou met enige korrupsie of die moontlike diefstal van geld nie.
Die departement se hervormingsprogramme loop reeds geruime tyd deur onder kwaai kritiek, selfs van binne die Regering.
Vroeg vanjaar het navorsing wat die Departement vir Beplanning, Monitering en Evaluering gedoen het, bevind die Departement van Landelike Ontwikkeling en Grondhervorming se programme was heeltemal ontoereikend wat steun, opleiding en monitering betref.
GELDMORS
Mnr. Justice Mnguni, die ANC se hoofsweep by die Parlement se portefeuljekomitee vir landelike ontwikkeling en grondhervorming, het op ’n vergadering van die komitee gesê ten spyte daarvan dat die land nou ’n grondwaardeerder-generaal het, koop die departement steeds grond teen buitensporig hoë pryse.
Mnr. Thomas Walters, die DA se skaduminister vir landelike ontwikkeling en grondhervorming, sê die kwessie sal dieper in die Parlement bekyk word om vas te stel wat die spesifieke beweegrede is.
“Daar is beslis kapasiteitsprobleme en dit kom terug na ’n tekort aan goeie bestuur en leiding binne die departement.
“Ons verwelkom enige stappe om die departement beter te laat funksioneer, maar die direkteur-generaal staan maar net aan die hoof van ’n reeds disfunksionele departement en die verwydering van een of twee amptenare sal nie die probleem oplos nie.”
Walters het gesê die departement kort ’n totale ommekeer soos reeds gesien in die groot aantal onsuksesvolle grondhervormingsprojekte.
Die departement se onbeholpenheid is onlangs aan die groot klok gehang toe die Sondagkoerant Rapport berig het hoe ’n suksesvolle hoenderplaas, Tokheim Pluimvee buite Brakpan, binne ’n jaar verwoes is weens wanbestuur ná die Departement van Landelike Ontwikkeling en Grondhervorming dit aan ses onervare begunstigdes oorhandig het.
PANNAR-KORING KRAAI KONING