GRASS VALLEY-MYN KRY GROEN LIG
Boere in Limpopo se Grass Valley-omgewing naby Mokopane is bitter teleurgesteld oor die Departement van Minerale Hulpbronne se goedkeuring van Sylvania Platinum se aansoek om die ou Grass Valley-chroommyn weer oop te maak.
Sylvania, wat dié myn se mynhope wil herwerk en ook uit ’n oop groef en ondergronds daar wil myn, was een van die eerste maatskappye in die omgewing wat by die provinsiale departement van minerale hulpbronne aansoek gedoen het vir omgewingsgoedkeuring ingevolge nuwe wetgewing.
Voorheen moes die Departement van Omgewingsake en Toerisme dié aansoeke hanteer.
Boere meen hulle kan skade ly as Sylvania die ou chroommyn se skagte ontwater.
Mnr. Emile Honiball, die boere se regsverteenwoordiger, sê hulle bestudeer die goedkeuringsbrief en sal dan besluit of hulle gaan appelleer.
DROË BOORGATE
Toe water in die 1980’s uit die ondergrondse skagte van Grass Valley-chroommyn gepomp is, het die boorgate van boere in die omgewing oornag opgedroog, sê mnr. Dewald de Beer, wat tans langs die ou myn se grond boer.
Mnr. Ken Smit van die plaas Moorddrift, byna 10 km van die myn, sê die watertafel het eers in die 1990’s weer herstel.
Daarop het mnr. Albert Jordaan van Sylvania gesê Sylvania beoog in elk geval nie om dadelik die ou ondergrondse skagte, van
ongeveer 250 m diep, te ontwater nie. Die myn wil in fases wil uitbrei en sal eers later verdere studies laat doen om te wys waterbronne sal nie hierdie keer geraak word as die ou skagte weer ontwater word nie.
Die goedkeuring van die departement vereis ook verdere studies en monitering as ’n voorwaarde vir goedkeuring. Boere meen egter Sylvania stoomroller die mynaansoek deur sonder om die risiko wat ’n myn vir landbou inhou, behoorlik in ag te neem.
Dr. Eugene Gouws, landbounavorser, sê die gebied het diep rooigrond met hoë landboupotensiaal, maar vanweë lae reënval en ’n kort groeityd is boere in die omgewing afhanklik van grondwater.
Sylvania het ook appèl aangeteken teen die Departement van Omgewingsake en Toerisme se afkeur van hul omgewingsaansoek om in die Nyl-vloedvlakte op die plaas Volspruit naby Grass Valley te myn. Twee besproeiingskultivars van Pannar het die beste in OVK se koringproewe in die distrik Hopetown gevaar. Dis die vyfde agtereenvolgende jaar dat OVK strookproewe vir sy boere aanplant, waarvan PAN 3471 vier keer die hoogste opbrengs opgelewer het. Vanjaar was dié kultivar se opbrengs 10,41 ton per ha, gevolg deur PAN 3515 (10,35 ton per ha). In die derde plek was Krokodil van K2 (10,29 ton per ha), gevolg deur PAN 3623 en PAN 3479. Die opbrengs van drie K2-kultivars, SST 866, SST 895 en SST 875, het gewissel van 10,2 ton/ha tot 9,9 ton/ha. Mnr. Dirk Gunter, bestuurder van OVK se landboukundige diens, sê die hoë opbrengs was uitstekend, gegewe die beperkte produksietoestande van die vorige seisoen.