VERE WAAI OOR INVOER
DIT was ’n onstuimige jaar vir die pluimveebedryf, hoofsaaklik oor die Amerikaanse wet op groei en geleenthede in Afrika (Agoa), hoenderpryse en pekelwater in hoendervleis.
Op 11 Januarie het pres. Barack Obama van Amerika ’n sperdatum van 16 Maart gestel om Amerikaanse hoendervleis op Suid-Afrikaanse winkelrakke te sien, anders sou Suid-Afrika sy voordele ingevolge Agoa verloor.
In daardie stadium is klein huishoudelike, administratiewe en kommunikasiekwessies deur invoerders die skuld gegee oor hoekom daar nie begin kan word met die invoer van die jaarlikse kwota van 65 000 ton hoenderstukke aan die been sonder teenstortingstariewe nie.
Die plaaslike pluimveebedryf was ontevrede oor die verslapping in vereistes oor salmonella en voëlgriep waaraan Amerikaanse boere moet voldoen. Die toegewings wat vir Amerikaanse boere geld, geld nie vir plaaslike boere óf ander lande se uitvoerders nie, was mnr. Kevin Lovell, uitvoerende hoof van die Suid-Afrikaanse Pluimveevereniging (SAPV), se beswaar.
Vroeg in Maart het die eerste Amerikaanse hoendervleis egter Suid-Afrika begin binnekom.
In September het die bedryf nog ’n knou weg toe die Hooggeregshof in Pretoria ’n aansoek deur die SAPV dat nuwe regulasies oor die pekelperk tersydse gestel en hersien moet word, met koste van die hand gewys het. ’n Perk van 15% pekelwater in hoenderstukke geld sedert 22 Oktober.
DATA
Deur die loop van die jaar was daar ook ’n gestryery oor Statistieke SA se opname oor prysstygings. Volgens Statistieke SA het die prys van bevrore hoenderstukke in Januarie met byna 27% en in Februarie met byna 40% gestyg teenoor die ooreenstemmende tyd in 2015.
Die SAPV het dié syfers bevraagteken en gesê daar moet ’n statistiese afwyking wees. Lovell het gesê dalk moet vars hoendervleis nie in die basiese voedselmandjie bereken word nie omdat dit net 10% van verkope verteenwoordig teenoor kitsbevrore stukke wat tot 63% van die mark uitmaak.
Oor die belangrikheid van die pluimveebedryf het me. Tracy Davids, ’n koördineerder by die Buro vir Voedsel- en Landboubeleid (BFAP), in Julie gesê dit is die grootste landbousubsektor en het verlede jaar 16,5% van die landbou se produksiewaarde verteenwoordig. Sy meen egter die bedryf is onder groot druk. Van 2010 tot 2015 het voerkoste met 75% gestyg, maar produsentepryse met slegs 56%. In dieselfde tydperk het invoer van 240 000 ton per jaar tot 457 000 ton per jaar gestyg.
Laat in die jaar het die Food and Allied Workers Union protesoptogte gehou teen goedkoop hoendervleisinvoer uit die Europese Unie. Teen druktyd het die bedryf gewag om te hoor of mnr. Rob Davies, Minister van Handel en Nywerheid, sou instem om ’n aanbevole beskermingsheffing van 13,4% op ingevoerde hoendervleis af te kondig.
Van 2010 tot 2015 het voerkoste met 75% gestyg, maar produsentepryse met slegs 56%. In dieselfde tydperk het invoer van 240 000 ton per jaar tot 457 000 ton gestyg.