Droogte ’n slag vir nasionale kudde
AFGESIEN daarvan dat veeboere vanjaar kwaai onder die droogte gebuk gegaan en die getal vroulike diere op plekke, soos in die Noord-Kaap, met sowat 20% afgeneem het, was daar ook ander probleme, soos tekorte aan entstowwe en die verspreiding van dieresiektes.
Prof. Ferdi Meyer, direkteur van die BFAP, het in Junie gesê die veebedryf gaan sowat vier jaar nodig hê om te herstel van die droogte se uitwerking op weiding en veegetalle.
In dieselfde tydperk het boere ernstig begin kla oor prysstygings en voorraadtekorte van Onderstepoort Biologiese Produkte (OBP) se entstowwe. Dit het gevolg nadat OBP sy verspreidingsvennootskap met Bayer beëindig en sy produkte self na koöperasies en veeartse begin versprei het.
Dr. Steven Cornelius, uitvoerende hoof van OBP, het aan die Parlement se portefeuljekomitee vir landbou, bosbou en visserye erken dat OBP in die eerste drie maande sedert sy verspreidingsooreenkoms met Bayer tot ’n einde gekom het, probleme met verspreiding ondervind het. Selfs nadat hy later die versekering gegee het daar is genoeg entstowwe beskikbaar, het koöperasies steeds gekla oor die verkryging daarvan. Die grootste haakplek het geblyk kommunikasie tussen OBP en sy kliënte te wees.
Einde Oktober het dr. Pieter Prinsloo, ondervoorsitter van die Rooivleisprodusente-organisasie (RPO), gesê die bedryf se voorbereidings vir ’n hofsaak teen OBP gaan voort, en die hele waardeketting is daarby betrokke.
Deur die loop van die jaar is by verskeie geleenthede gewaarsku brucellose ruk handuit en is ’n ernstige bedreiging vir vleisproduksie. Mnr. Gerhard Schutte, hoofbestuurder van die RPO, het gesê die siekte hou ’n ernstige bedreiging vir die kalfpersentasie van Suid-Afrika se veestapel in. Dit kan ook mense wat besmette vleis eet, siek maak.
Volgens hom was die siekte teen 1994 bykans ten volle onder beheer, maar dit het sedertdien ernstige vlakke aangeneem, hoofsaaklik in Noordwes, die Vrystaat en Limpopo. Dit het ook opnuut in die SuidKaap uitgebreek.