Groot risiko, groot wins
Met ’n groot aptyt vir risiko lewer dié ingesteldheid ook groot wins – en die kroon as die nasionale Jongboer van die Jaar. Sedert mnr. Jacques Beukes tien jaar gelede op die familieplaas Modderdrift naby De Doorns begin werk het, het die omset met ’n verbysterende 920% verhoog en die tafeldruifopbrengs meer as verdubbel.
Die uitbou van die familieboerdery is stelselmatig aangepak: Eers het hy gesorg dat die gesogste druiwekultivars van wêreldgehalte is; daarna is ’n ultramoderne pakhuis opgerig wat aan die vereistes van die wêreld se gesogste akkreditasiestelsels voldoen, en uiteindelik is die beste bemarkers opgespoor.
Verdere verfynings is mikrobesproeiing Mnre. Tebogo Mogashoa en Jacques Beukes. Die mikpunt van hul vennootskap is 1,35 miljoen kartonhouers tafeldruiwe per jaar. wat na drup omgeskakel is, ’n gehaltebeheerstelsel en ’n eenvoudige plan om stokke gouer in produksie te laat kom. Danksy laasgenoemde kon die boerdery ’n jaar op produksie wen.
Hy verkoop meer as die helfte van sy druiwe in Brittanje en 30% in die VerreOoste.
Jacques het onlangs ook ’n suksesvolle vennootskap met die Johannesburgse entrepreneur en ingenieur mnr. Tebogo Mogashoa, voorsitter van die Talis Holdings Group, tot stand gebring.
Die maatskappy Brandwagt Table Grape Producers and Exporters gaan binne vyf jaar sowat 1,35 miljoen kartonhouers (4,5 kg) tafeldruiwe – alles uiters gesogte kultivars – naby Worcester pak en uitvoer. Benewens 100 permanente werkgeleenthede gaan 500 tydelike werkers betrek word by die vestiging van 140 ha uitgesoekte tafeldruifkultivars – groei van nog 300% by die bestaande familieboerdery.
Niks word op klein skaal aangepak nie. Danksy finansiering van die nywerheidsontwikkelingskorporasie (IDC) gaan Jacques en Tebogo op Brandwagt die modernste tafeldruifpakhuis in die land bou. Dit gaan 6 000 m² groot wees en hulle wil binne vyf jaar 900 000 kartonhouers druiwe daar pak.
Die uitvoergerigte tafeldruifbedryf bied Tebogo ’n defensiewe beleggingstrategie. “Dis ’n kans om buitelandse valuta te verdien en voordeel te trek uit iets wat ’n slegte situasie kon wees. Dit maak kommersieel sin om in ’n tafeldruifplaas te belê. Dit voeg nie net waarde toe tot die land se ekonomie nie, maar bied ’n geleentheid om waarde uit die internasionale mark te kry.”
En al is Jacques waaghalsig, is hy nié roekeloos nie . . . “Ek gaan kyk altyd wat die gevolge is van wat ek doen. En ek doen deeglike beplanning en sorg dat die somme klop.”
Sy anker is ook stewig in die familiebesigheid. “Ons vergeet dikwels die waarde van ’n familiebesigheid. Die Afrikaner is geneig om sy eie rigting te wil inslaan, maar ons moet begin saamstaan.”