Woestynsand omskep in besproeiings-Eden

Dit is moeilik om 400 000 ha voergewasse, mielies, vrugteboorde en ander aanplantings tussen die duine te visualiseer, maar dis presies wat in die Soedan beoog word.

Die eerste fase van 6 000 ha onder besproeiing pryk reeds tussen die duine danksy die kundigheid van mnr. Johann Hiemstra van Nelspruit se Floppy Sprinklerstelsel en die projekleiding van mnr. IB Oosthuizen (foto bo) van Terratek, presisieboerderyafdeling van Suidwes Landbou.

Die aanvoorwerk van die projek kom uit die Verenigde Arabiese Emirate. Die maatskappy Jenaan Investments het in 2013 ’n ooreenkoms met Suidwes Landbou aangegaan om oor vyf jaar die nodige kundigheid te verskaf. Die maatskappy Amtaar, wat deur Jenaan en die Soedannese regering gestig is, voer die projek uit.

Die lande by Al Dabbah, sowat 360 km noord van die hoofstad, Khartoem, is reeds bedek met weidings. Alles word besproei uit boorgate wat gesink is tot in ondergrondse waterbronne wat uit 150 000 km² waterdraende bros gesteentes bestaan.

IB sê die bouwerk aan die volgende fase het nog nie begin nie omdat Johannhulle ’n nuwe soort sproeier ontwikkel. Johann sê die sproeier lewer 40% méér water met ’n effens groter druppel en ’n wyer spasiëring. Só sal die stelselkoste met 22,5% verminder.

Hoewel daar tans net voer vir diere verbou word, begin die groep binnekort om op groot skaal voedsel te lewer. Grondboon en mielieproewe is afgehandel. Verder, sê IB, word ’n kwekery opgerig om vrugtebome te kweek. Hulle wil so gou moontlik tafeldruiwe en mango’s begin verbou en uitvoer.

’n Voerkraal met plek vir 100 000 beeste sal binnekort in bedryf kom. Aanvanklik gaan 20 000 lewende beeste per maand na hoofsaaklik Egipte en Europa uitgevoer word. –