Volle waardeketting vir volhoubaarheid
As wildboere méér aandag aan die volle waardeketting gee, sal dit hul volhoubaarheid verhoog en hulle minder afhanklik maak van uitsonderlik hoë pryse vir skaars wild.
Mnr. Wiaan van der Linde (foto), voorsitter van Wildbedryf Suid-Afrika en eienaar van onder meer WB Safari Company, sê boere moet mik na die ideaal om by die héle waardeketting betrokke te raak.
Wiaan en sy vennoot, mnr. Hennie Gous, bedryf Wintershoek Wild by Kimberley saam en boer elkeen op sy eie grond, wat altesaam 110 000 ha beslaan. Wiaan, met ’n graad in sielkunde, het elf jaar gelede op huurgrond met wild begin boer.
Hulle doen geen intensiewe teling met hoëwaardewild, soos buffels, swartwitpense, bastergemsbokke en renosters, nie. Hulle spits hulle wel toe op die teel van geharde teelbulle en vroulike diere wat op enige plek kan aanpas.
Die befaamde buffelbul Tyson, met ’n horingwydte van 53 duim, kom uit hul stal.
Hulle is betrokke in verskeie fasette van die wildbedryf: Die teel van algemene wildsoorte met topmateriaal, die safaribesigheid Wintershoek Safari’s gemik op binne- en buitelandse klante, die toerismebesigheid Wintershoek Photographic Safari’s, hul eie leerlooiery en taksidermiebesigheid, African San Taxidermy and Tannery, en Oryx Venison, ’n aanleg wat sowat 300 ton wildsvleis per jaar verwerk. Hulle verskaf permanente werk aan sowat 140 mense.
Wiaan sê wanneer nuwe wetgewing goedgekeur word, sal dit ’n vloerprys vir wild verseker en ’n nuwe bron van kontantvloei vir wildboere moontlik maak. “Die wetgewing sal hulle toelaat om vrylik met wild handel te dryf, soos met skape en beeste. As ons geëtiketteerde wildvleis op winkelrakke kan plaas, sal ons op gelyke voet met die ander vleissoorte kan meeding.”
Dié leier in die wildbedryf sien egter nóg skakels in die ketting wat hy wil benut. Hy wil byvoorbeeld inskakel by ’n vleisproduksienetwerk om toegang tot die groot kettingwinkels se vleisrakke te kry en vleis uit te voer. Hy en Hennie is ook besig om ’n binnenshuise leerlooiery te bou waar waarde tot wildsvelle gevoeg gaan word – en dit vir die vervaardiging van skoene voorberei gaan word. Die eerste skoene sal in Maart bemark word.