Aan die voorpunt van vernuwing

Ondanks sy jeugdigheid is die 28-jarige mnr. Vickie Bruwer jr. (foto), Noord-Kaapse Jongboer van die Jaar, reeds ’n toonbeeld van die durf van ’n praktiese besproeiingsboer.

Hy stam uit die bekende en bekroonde Genadeboerdery, waar grondgesondheid en balans tussen die grond, gewasse en natuur voorop in hul boerderyfilosofie staan.

Aan die oewer van die Vaal- en Rietrivier by Douglas bestuur Vickie jr. ’n groeiende boerdery met hoofsaaklik mielies, koring, lusern en grondbone, en afwisselend aartappels saam met sy broers, Hannes en Gerhard, op landerye met ’n hoë opbrengspotensiaal.

Hy volg ’n basiese, maar aanpasbare wisselboustelsel. Produkpryse en veral volhoubaarheid kry aandag. Danksy ’n fyn hand op insetkoste en presisieboerderybeginsels kry hy dit reg om ’n hoër opbrengs teen ’n laer insetkoste te behaal en die boerdery teen minstens 10% per jaar te laat groei.

Geen besonderheid word aan die toeval oorgelaat nie: Kultivarproewe word elke seisoen met byna elke gewas gedoen, hy pas werktuie aan om in te pas by sy stelsel van verminderde en strookbewerking en hy bou self infrastruktuur, soos pompstelsels.

Elke landery word weekliks besoek en ’n span bemestingkonsultante is beskikbaar om vinnig te reageer. “Hoe meer oë daar is, hoe gouer kan ’n mens foute raaksien en daarop reageer.”

Diversifikasie bly die Bruwers se uitgangspunt om risiko te bestuur. Hulle hou ook vlaktewild aan, bied jagtogte en verblyf aan en die beeskudde benut die oorlêlande totdat die grondvoorbereiding vir die vroeë planttyd in Oktober begin. Die topaanteelverse word behou, terwyl die res in die voerkraal afgerond word.