SA veerasse gesog in buiteland
Die Dorper kan binne vyf jaar sy plek as volwaardige wêreldklasburger inneem. Veral boere in China en sekere Oosbloklande staan bakhand vir Suid-Afrikaanse teelmateriaal. Volgens die ervare Dorperboer mnr. Dries Wiese (foto bo) gaan die belangstelling “die verstand te bowe” – en versoeke van 150 000 embriospoelings per boer per jaar is al ontvang.
Besoekende Chinese aan die Bloemskou vroeër vanjaar het aangedui dat hulle ’n verdubbeling in vleisproduksie bewerkstellig het deur Dorperramme by swak plaaslike moederlyne te gebruik, berig
Nog ’n reuseversoek is uit Rusland ontvang – ’n boer wat ’n ooikudde van 600 000 diere benodig! Dries meen die genootskap kan net 120 000 per jaar lewer, maar dat plaaslike boere dié uitdaging sal kan oorkom en dat hulle dit as ’n vyfjaarplan beskou.
Suid-Afrikaners wat by die Chinese veebedryf betrokke is, dra by tot die belangstelling in plaaslike teelmateriaal. Dit is mense soos drr. Fanie Steyn, hoof van Ramsem, die internasionaal geregistreerde KI-en-embriosentrum, en Francois Marais, ’n veearts wat nou in Australië bly en help met die uitvoer van embrio’s na China en Suid-Afrika.
Francois meen onder meer die Dorper die suksesvolste vleisskaapras ter wêreld. “Dit het ’n reuseverskil in Australiese vleisproduksie gemaak, dalk die grootste verskil tot nog toe in dié land se skaapbedryf.” Nou moet die Regering net sy sokkies optrek om die uitvoerprotokol met sekere lande goedgekeur te kry . . .
En uit Paraguay, ’n land waar rasse soos die Hampshire Down, Suffolk en Texel die botoon gevoer het, berig dat almal deesdae nét oor Dorpers praat.
Die Brits-gesin, voorheen van Vrede in die Vrystaat, veroorsaak ’n omwenteling in die skaapbedryf. Skaapboerdery is daar nog altyd afgeskeep, maar sedert die Dorper (ná ’n opdraande burokratiese stryd) as ras toegelaat is, voer tant Annie, haar seun, Jaco, sy vrou, Alta, en húl kinders, Janneman, Petri en Willemin, teelmateriaal in van Suid-Afrika.
Die eerste lammers uit die embrio’s is in 2010 gebore. Vir die embriomoeders word kruisgeteelde, geharde Santa Inés-ooie gebruik wat geselekteer is vir moeder- en melkeienskappe. Aanvanklik is nét die swartkop-Dorper gebruik, maar die afgelope tyd het Wit Dorpers ook hul verskyning gemaak.
Volgens Jaco is ander boere in verwondering oor hoe die ras presteer. “Dit het ’n totale oplewing in die skaapbedryf veroorsaak.” Jaco se stoetery het in die afgelope vyf jaar die trofee ontvang vir die beste stoetery en die hoogste punte behaal op al die skoue. Dorperpioniers in Suid-Amerika: Tant Annie Brits, haar seun, Jaco, en sy vrou, Alta, het die werk voortgesit wat Annie se man, Mike, voorheen van Vrede in die Vrystaat, aangevoer het.