R20 miljoen omset op net 24 ha
Dr. Hinner en mnr. Heiko Köster, twee broers en veekundiges, kon nie die boerderybloed in hul are ignoreer nie en het ’n intensiewe boerdery met ’n ongelooflike omset van R20 miljoen op net 24 ha by Cullinan buite Pretoria staangemaak.
Buite Vryburg, waar die Kösters grootgeword het, moet ’n boer tans 30 000 ha tot 40 000 ha en 5 000 koeie hê om van só ’n omset te praat.
Hul Ukhebe-lêhenboerdery bestaan uit 100 000 hoenders wat jaarliks sowat 25 miljoen eiers lewer – en 90% tot die boerderyinkomste bydra. Hulle bedryf ook die Herefordstoetery Vicedale en die Dohne-Merino- en Dorper-stoetery Viceko, wat onderskeidelik 7,5% en 2,5% tot hul omset bydra.
Hinner (foto) is in beheer van die voedingsprogramme. Heiko koördineer bestuurs- en bedryfsaspekte en verseker die lêhenboerdery se hoë standaard. Heiko se vrou, Esté, ’n professor in diereteelt, gebruik genetiese teelwaardes in die bees- en skaapkuddes om diere met meerderwaardige teeleinskappe te identifiseer. Die broers is ook aandeelhouers in Kaonne-beleggings, wat bestaan uit vyf maatskappye in die dierevoedingketting.
Die beesstoetery het ontstaan danksy ’n kernkudde van 30 teelkoeie wat die Kösters by hul ouers, Hans en Heide, oorgeneem het met dié se aftrede. Vandag het hulle 120 geregistreerde beeste.
Hoewel Cullinan in ’n hartwatergebied is, kon hulle met goeie bestuur en ’n spesiale hartwaterprogram die beesboerdery laat slaag. Hulle glo ook net die beste is goed genoeg vir vinnige genetiese vordering in hul stoetery. Daarom het hulle verlede jaar R195 000 opgedok vir die nasionale grootkampioen-Herefordbul, Locheim Performer WDW 12-53.
Hulle besit ook die helfte van Vicemong Hereford Genetics, waardeur hulle meerderwaardige teelmateriaal wêreldwyd soek en/of self teel.
Sowat 14 ha van die plaas is onder natuurlike beweiding en vir wisselbeweiding in sewe kampe verdeel. Nog 10 ha is met kikoejoegras gevestig wat in die somer bewei word. Gedurende Maart saai hulle raaigras tussen die kikoejoe vir winterweiding.
Die plaas het 18 werkers in diens, van wie 14 in die lêhenafdeling werk.
PROF. PEET, DIE BOERE SE WEERHAAN