Van melkboer tot swaargewig-sakeman

Hy’t in die distrik Dordrecht begin as ’n melkboer met een werker – en vandag is mnr. Ken Clark (foto) een van die grootste verskaffers van melkprodukte in die Oos-Kaap. Hy het met Twizza-gaskoeldranke boonop iets reggekry wat nie eens Pepsi met Coca-Cola kon doen nie: In die Oos-Kaap is Twizza die grootste verkoper van gaskoeldrank, en in Suid-Afrika is dit die grootste verkoper naas die kolareus.

Ken vertel dat hy in 1980 as die enigste melkboer in die distrik Dordrecht gepasteuriseerde melk aan plaaslike mense begin verskaf het. Later het hy melk aan die Dairybelle-kaasfabriek op Dordrecht gelewer.

Een van sy klante het by hom melk gekoop en dit in die destydse Transkei versprei. Ken het ’n goeie sakegeleentheid raakgesien en in 1984 die Crickley Dairy-maatskappy gestig. In 1990 het hy ’n plaas van sowat 1 500 ha naby Indwe gekoop en later ’n gebou aangeskaf waar hy die melk kon pasteuriseer.

In 1994 het hy ophou boer en besluit om hom heeltyds op die verwerking en verspreiding van melk toe te spits.

Kort daarna het hy besluit om na die groter en meer sentrale Queenstown te skuif. Hy het ’n melkfabriek opgerig en mettertyd begin om ook jogurt, room en maas (amasi) te lewer, en later ook vrugtesap en melkversnitte.

Vandag versprei hy Crickley-produkte aan van spazawinkels en kleinhandelaars tot by groot supermarkte – van George tot Kokstad.

Crickley koop sowat 45 000 liter melk per dag van ses boere in die Queenstown-omgewing aan. Daar werk sowat 200 mense vir die melkery.

In 2003 het hy met ’n banklening ’n fabriek langs die melkfabriek opgerig waar hy Twizza-gaskoeldranke vervaardig. By die Twizza-fabriek in Queenstown werk sowat 350 mense en landwyd sowat 700 mense.