Verdubbel produksiesyfer met Afrikanerkoggelram
Die Ronderib-Afrikaner se natuurlike hoë dekvermoë, geslagsdrang en feromonale eienskappe bied ’n maklike en bekostigbare oplossing vir ’n skaapboer wat sy produksie ’n hupstoot wil gee sonder om sy grondoppervlakte uit te brei, sê die stoetboer mnr. Dries Wiese van Kasteel-boerdery naby Loxton.
Hy het al in die vroeë 1990’s plaasproewe met koggelramme van verskillende rasse gedoen en gesien die Afrikanerkoggelramme laat sy lampersentasie met 20 styg en verkort die lamtyd met 14 dae.
Dit is nog grootliks onbekend waarom Ronderib-Afrikaners juis so uitstekend as koggelramme vaar, maar Dries meen dis omdat die feromone wat die ramme afskei, die ooie laat superovuleer. Dr. Paul King het ook destyds in ’n studie agtergekom dat Ronderib-Afrikanerramme regdeur die nag ooie dek, terwyl Merinoramme tussen 23:00 en 04:00 heeltemal onaktief was.
Die Ronderib-Afrikanerram wend ook tot twee keer meer as Merinoramme pogings aan om ooie te dek. Dries se studies het getoon dat Ronderib-Afrikanerramme ooie bykans 43% meer suksesvol gedek het as Merinoramme.
Deesdae sit hy ook koggelramme tussen die ooie wanneer hulle kunsmatige inseminasie doen om sodoende besettings te vermeerder.
Dries boer met sowat 250 tot 300 Blinkhaar Ronderib-Afrikaner-ooie en verkoop sowat 100 koggelramme per jaar (teen ongeveer R3 000 stuk). Die ramme se saadstringe word deur ’n veearts geknip. Hoewel die ram steriel is, word semenproduksie of hormoonafskeiding nie beïnvloed nie. Die ram het steeds die manlike effek waarmee ooie gestimuleer word om op hitte te kom.
Dries sit tot 5% koggelramme by sy ooikudde. Die ramme is fluks en kan maklik 100 ooie in tien tot twaalf dae dek. Wanneer die teelramme bykom, laat Dries een koggelram agterbly.
“Hulle is baie aggressief. Die een wat agterbly, jaag dus die Merino- en Dorperramme ook aan.”