WERF VOL WERKTUIE
Op die plase Koedoesdam en Groenvlakte by Stella in Noordwes boer mnr. Jan Geldenhuys met kommersiële vleisbeeste. Hy bou feitlik al sy werktuie self. Van die arsenaal ontwerpe wat verskyn het (“Jan Knaphand bou plaas vol werktuie”, 11 Maart 2016), het die bossiekapper en kunsmistoediener die meeste aandag getrek. Bossiekapper. Jan oes jaarliks die oortollige bloubuffelgras as veevoer. Met sy ou bossiekapper het dit stadig gegaan, maar hy het ’n nuwe kapper ontwerp wat breed sny en die werk vinniger afhandel.
Sy kapper bestaan uit ’n raamwerk met drie swaailemme van 1,8 m elk en sny 5,4 m wyd. Die lemme wat die gras platsny, word deur die trekker se kragaftakker aangedryf. Die hoofdryfas lei vanaf die kragaftakker na ’n verdeelkas op die middelste seksie, van waar twee dryfasse na die ander twee seksies lei om die lemme te laat draai.
Jan trek die bossiekapper met ’n trekker van 52 kW. Die bossiekapper het hom sowat R130 000 gekos. Kunsmistoediener. Jan het ook ’n veeldoelige werktuig gemaak wat gelyktydig die grond losmaak en kunsmis op aangeplante weiding toedien. Dit bestaan uit twee ou Massey Fergusonsleepskottelsêe wat op ’n raamwerk van ’n ou vragmotoronderstel aangebring is.
’n Bakkieagteras met hidrouliese silinders word gebruik om die planter van die grond af te lig wanneer die trekker in die wenakker omdraai.
Die kunsmis word by die voorste stel skottels toegedien en die agterste stel skottels krap dit toe. Jan het die êe lank gelede vir R600 elk gekoop; die kunsmisbakke het hy reeds gehad en die vragmotoronderstel is by ’n skrootwerf gekoop. Hy moes net ’n paar stukke staal koop. Dit het altesame R4 000 gekos. 082 489 0090.