As daar ooit ’n tyd vir lees is, is dit nou (behalwe, natuurlik, vir dié wat nou moet vrugte oes).
Jy het op ’n plaas in die Kammanassie grootgeword en daarná saam met jou man op “klein-klein” plattelandse dorpies gewoon. Hoe het dit jou gebrei vir jou tyd in Engeland by die adel? Op die platteland kan jy nie ’n dansrok kóóp nie; jy moet dit self maak. Daar is nie bloemiste waar jy blomme kan koop nie; jy plant en pluk dit self. Gevolglik is jy verplig om jou talente en vermoëns te ontwikkel. Terwyl ek by Granny in Engeland was (lees Sabbatsreis), het ek besef hoe onkreatief dit ’n mens maak as jy alles klaargemaak kan koop of bestel. Granny se dogter kon nie eens ’n witkoek bak nie, en haar mond het oopgeval toe ek rooskonfyt kook. Al hierdie klein vermoëns saamgetel, het gemaak dat ek voorgekom het asof ek alles van alles weet.
As jy die bloubloed-stoutgatte aan jou eie kinderlewe kon blootstel, wat dink jy sou die grootste invloed op hulle gehad het? As ek hulle in die Kammanassie kon grootmaak, sou hulle geweet het hoe om na hartelus te spéél. Om self pophuise en plase te bou. Om winkel-winkel en skool-skool te speel. Modderkoekies te bak. Om nie te verwag dat ’n kneg die hoendereiers uithaal of vir die hoenders lusern gaan sny nie. Die geborgenheid van ’n pa en ma wat wérklik omgee, en regverdig is, sou na alle gelang die grootste blywende faktor in hul vertoiingde lewentjies gewees het.
In die tyd van Facebook spog mense eerder met hul goeie oomblikke, maar jy skroom nie om oor slegter ervarings te skryf nie. Is dit nie moeilik nie? Die foute wat ek maak en gemaak het, is foute wat menige mens maak. Dis sleg vir my gemoed om op te bondel. En niemand het my nog ooit oor my foute die verdoemenis ingestuur nie. Behalwe die NG Kerk, by ’n paar geleenthede.
Jy het swáár gekry in Engeland, maar dit lyk nie of enigiets jou kan onderkry nie. Wat het die ervaring jou geleer? Dit het my selfgeloof eindeloos versterk. Soms weet ek nie of ek onnosel of moedswillig is nie. Maar ek dink nie ek sal behoorlik kan leef as ek nie my horisonne verbreed nie. Die belangrikste ding wat ek in Engeland aan myself bevestig het, is dat ’n boerekind uit die Kammanassie, of van waar ook al, opvoedingsgewys nie vir die koninklikes hoef terug te staan nie. Ons is waaragtig uit rots gekap.
Vertel meer oor die titel, Alle mense bou lugkastele. Sommige staan sterk en regop. Ander tuimel in ’n stofwolk aarde toe. En van iewers af moet ons voortdurend die krag bymekaarskraap om die rommel op te ruim sodat ons ’n nuwe werf het om ’n nuwe kasteel op te bou.