DEPARTEMENT VERBIND HOM OM KORRUPSIE TE BEVEG

DIE Departement van Landbou, Bosbou en Visserye sal geen bedrog of korrupsie duld nie en sal nie iemand wat dit aanmeld, enigsins benadeel nie.

Met dié woorde het mnr. Mike Mlengana, direkteur-generaal, sy departement se amptelike standpunt oor bedrog en korrupsie verklaar. Hy het op die bekendstelling van die departement se jaarverslag in Pretoria gesê alle senior personeel het ’n verdrag onderteken om bedrog en korrupsie te beveg. Die verbintenis het saamgeval met die Internasionale Bewustheidsweek oor Bedrog.

Mnr. Trevor White, hoof van die forensiese afdeling by PricewaterhouseCoopers (PwC), sê uit ’n internasionale opname in 115 lande is dit duidelik dat ekonomiese misdaad pandemiese afmetings in Suid-Afrika aanneem.

White sê altesaam 69% van Suid-Afrikaanse respondente het aangedui dat hulle al slagoffers van ekonomiese misdaad was.

Dit is die hoogste van ál die lande en byna dubbel soveel as die wêreldgemiddelde van 36%

Die ekonomiese misdade wat die meeste voorkom, is die stroping van bates, gevolg deur bedrog met verkrygings, omkopery en korrupsie, asook kubermisdaad wat kwaai toeneem.

“Wat ontstellend is, is dat 70% van die respondente in Suid-Afrika meen dat ons wetstoepassers nie in staat is om ekonomiese misdaad doeltreffend te bestry nie.

“Net 44% twyfel in die vermoë van wetstoepassers in die res van die wêreld,” sê White.

“Met wetstoepassers wat beskou word as onvoldoende opgelei en toegerus, rus die onus op elke organisasie om homself te beskerm.”

Mnr. Freeman Nomvalo, voormalige rekenmeester-generaal, sê aktivisme onder die publiek is nodig om korrupsie en bedrog te beveg. “Om op wetstoepassingsagentskappe staat te maak, is soos om ’n stomp voorwerp as wapen te wil gebruik.” –