VERSKANSING | ‘Hou dit eenvoudig’
Gegewe die onstuimige kommoditeitspryse en wisselkoers is eenvoudige verskansingstrategieë nou graanboere se veiligste keuse, sê mnr. Jannie van der Watt, hoofbestuurder van GroCapital Finansiële Dienste (GroCapital), ’n afdeling van die landboudienste-en-voedselverwerkingsmaatskappy Afgri.
Oor die afgelope jaar het skommelinge in die wisselkoers en kommoditeitspryse boere en gebruikers van landbouprodukte aan groot wisselings in inkomste en produksiekoste blootgestel. Van der Watt sê vooruitsigte vir die rand bly onseker en uitgelewer aan internasionale én plaaslike risiko’s. Boere moet dus nie die wisselvallige markte probeer uitoorlê nie, sê hy. “Die regte verskansingstrategieë teen prysrisiko, hetsy wisselkoers of kommoditeit, sal boere help om in onsekere tye ’n redelike wins te toon.
“Kliënte wat weens die wisselvalligheid in die kommoditeitsen wisselkoersmark in die versoeking kom om spekulatiewe posisies in te neem, behoort ’n afsonderlike spekulatiewe rekening te open en vooraf te besluit hoeveel hulle bereid is om daarin te belê,” sê Van der Watt. Vanaf September 2014 tot Augustus verlede jaar was die weeklikse gemiddelde verskil in die rand se hoogste en laagste waardes 32 sent, maar in die daaropvolgende twaalf maande was dit 113% hoër, naamlik 68c. Terselfdertyd was die gemiddelde weeklikse verskil in die hoogste en laagste witmieliepryse vanaf September 2014 tot Augustus verlede jaar R143/ton, teenoor R212/ton tussen September verlede jaar en Augustus vanjaar.
–