DIEANDERSÊ
Die gebruik van landbougrond in die Oos-Kaap is beslis nie optimaal nie, maar daar is tog heelwat gunstige neigings in landboubedrywe in dié provinsie, volgens die Agbiz-ekonoom mnr. Wandile Sihlobo.
Volgens data van die Melkprodusente-organisasie was die Oos-Kaap in 2015 die grootste melkproduserende provinsie in Suid-Afrika en het nagenoeg 30,6% van die land se melk gelewer. Dit was ’n toename van 3% teenoor die vorige jaar. Die provinsie se melkboere is nadelig geraak deur verlede jaar se droogte, maar daar kan vanjaar herstel wees.
Dan neem die aantal nuwe kommersiële produsente toe, veral van graan en oliesaad, by Matatiele, Ugie en Maclear. ’n Aantal van dié boere het voordeel getrek uit die steun van landbougroepe en private beleggers, soos onder meer Graan SA met sy boere-ontwikkelingsprogram en Old Mutual se Masisizane-fonds wat verlede jaar nagenoeg R46 miljoen daar belê het.
Verder is daar ook nuwe landboumaatskappye gestig, soos Matatiele Grainco, ’n graanmaatskappy in uitsluitlik swart besit wat klem lê op landboumeganisasie en graanvervoer in die OosKaap en KwaZulu-Natal.
Dié ontwikkelinge is verfrissend, maar ’n aantal struikelblokke lê nog landbouproduksie in die provinsie aan bande, soos swak infrastruktuur (paaie en silo’s) en kommunale verblyfreg.