BRAND IN ROGGEVELD LAAT VEEBOERE SONDER WEIDING
DIE brand wat ses dae lank oor die Nuwejaartyd op plase in die Roggeveld tussen Calvinia en Middelpos gewoed het, het sowat 25 000 ha veld verwoes.
Die sewe boere wat geraak word, het dringend voer nodig, sê mnr. André Steenkamp van die plaas Elandsfontein en mnr. Willem en me. Huibrey Theron van die plaas Droëkloof. Steenkamp sê die brand het alles verwoes. “Van goeie weiveld het net as en klippe oorgebly.”
Die Therons, wat die helfte van hul weiveld in die brand verloor het, sê dit is ’n kritieke weidingstyd omdat die meeste van hul Merinoooie dragtig is en vanaf Maart begin lam. Hulle trek nog met hul vee tussen winter en somerreëngebiede, ’n ou praktyk wat met groot welslae in sekere veegebiede in die NoordKaap toegepas word.
“Die veld wat afgebrand het, was ons somerweiding wat ons moes deurdra tot April en Mei wanneer ons uit die Roggeveld onttrek,” sê me. Theron.
Boonop het dié distrik drie jaar laas voldoende reën gehad. Die brand is veroorsaak deur ’n smeltdraad wat afgebrand het as gevolg van ’n foutiewe Eskomtransformator op die plaas Botuin.
Steenkamp sê boere op wie se grond die brand gewoed het én boere van Fraserburg, Calvinia, Williston, Sutherland en Nieuwoudtville het die brand dag en nag bestry.
Konserwatief bereken benodig die boere wat deur die brand geraak word, sowat 6 ton onderhoudsvoer per dag vir die volgende vier maande.
Hulle is dankbaar vir die 15 ton voer wat hulle reeds van die groep Boere in Nood ontvang het en die 20 ton lusern van die NoordKaapse departement van landbou, grondhervorming en landelike ontwikkeling. Mense wat voer, vervoer of geld kan skenk, kan mnr. Wimpie Steenkamp, voorsitter van die landbouvereniging SuidRoggeveld, bel by 082 924 5718.
–
Die brand is veroorsaak deur ’n smeltdraad wat afgebrand het as gevolg van ’n foutiewe Eskom-transformator op die plaas Botuin.