GIFSPUIT KORREL ULTRAPRESIES
’n Hoogs tegnologiese, outomatiese toediener van onkruiddoder word in Brittanje ontwikkel. Dit skiet klein druppeltjies gif na individuele onkruidblare binne-in en tussen ’n ry gewasse.
Die akkuraatheid waarmee hierdie toediener werk, is so presies dat tot 95% minder van so ’n middel nodig kan wees vir doeltreffende onkruidbestryding, volgens die ontwikkelaars.
Die toediener sal ’n beeldstelsel gebruik om onkruid op ’n land van gewasse te onderskei, en dan evalueer wat die nodige dosis druppeltjies is om die onkruid in verskillende groeifases uit te wis.
Die span kundiges aan die Universiteit van Reading in Berkshire, Brittanje, wat daaraan werk, sê hul doelwit is dat geen onkruiddoder op die gewas toegedien word nie, ook niks op die grond nie en net op die onkruid.
Hulle hoop om só ’n geoutomatiseerde, beeld-aangedrewe druppeltoedieningstelsel teen aanstaande jaar gereed te hê vir voorlopige veldproewe.
Hulle beskryf die konsepstelsel as ’n paradigmaskuif in onkruidbestrydingstegnologie, wat selektiewe onkruidbestryding met ’n ingenieursbenadering pleks van ’n chemiese wyse sal bewerkstellig.
In ’n voorlopige toets op ’n koolland verlede jaar het doelgerigte glifosaatdruppeltjies wat op dié wyse meganies toegedien is, 92% van die onkruid bestry, asook betekenisvol hoër opbrengste verseker as met die vooropkomsmiddel pendimetalien, wat konvensioneel toegedien is.
Dr. Alistair Murdoch, die spanleier, sê dit is ’n pioniersprojek. “Die belangrikheid van suksesvolle bevindings in hierdie projek kan nie genoeg benadruk word nie.
“Dit is veral belangrik sodat sistemiese, aktiewe breëspektrumbestanddele, soos glifosaat, vir boere en produsente beskikbaar bly.”