Oeroue praktyke vir unieke wyn
Die onafhanklike Swartlandse wynmaker Johan Simons het die jaar 1900 as hoogtemerk gekies en maak steeds sy wyn volgens die ou, ou tradisies van daardie verbygegane tyd.
In die jaar 1900 was koper en swael reeds as swamdodermiddels beskikbaar, maar van kommersiële gis het wynmakers toe nog nie gehoor nie. Daar was ook net baie eenvoudige masjinerie – soos mandjieperse – tot hul beskikking in die kelder. Dié prentjie het nog altyd Johan Simons se verbeelding aangegryp. “Daar was in die kelder min ingryping in die wynbereidingsproses. Natuurlike wyn en natuurlike wynbereiding praat nou nog met my,” vertel Johan, wat saam met sy vrou, Diana, die landgoed Fynbos in Joubertskloof in die Paardebergstreek (tussen Malmesbury en die Paarl) besit.
Johan, wat voorheen ’n molekulêre bioloog was, is lid van die Swartlandse Onafhanklike Produsente (SOP) en maak vandag nog sy agt soorte Dragonridgewyne volgens die metodes van vervloë dae. Vir vonkelwyn volg hy die méthode ancestrale.
Die druiwe word met die hand gepluk, so min as moontlik gehanteer, natuurlik gegis en liggies gepars. Dis ongefiltreer en het ’n lae swaelinhoud.
“Ek hou nie daarvan om so baie chemikalieë in my liggaam te hê nie. Jy weet, dis dieselfde met kos en die rede waarom ek nie verwerkte voedsel eet nie,” verduidelik hy waarom hy die spesifieke metodes volg.
“Dis eenvoudig hoe ek daarvan hou,” sê hy skouerophalend. En Diana ondersteun hom heelhartig. “Wynbereiding is sy grootste passie. As dit hom na plekke neem wat nie kommersieel lewensvatbaar is nie, probeer ons dit maar absorbeer,” sê Diana en lag.
Sy bedryf haar sielkundepraktyk van die plaas af. Daar is ook ’n afsonderingsoord, onthaallokaal in die ou perdestal, verblyf vir sowat 44 mense en ’n maandelikse eetklub op die plaas van 320 ha wat hulle 21 jaar gelede gekoop het.
OU, OU WINGERD
Altesame 270 ha van Fynbos – wat reeds in BO: LIGGING 1690 gestig is, met graniet en bergfynbos spog en die tuiste is vir interessante diere, soos erdvarke – is tot natuurreservaat verklaar. Op die oorblywende grond groei daar 16 ha organiese bosstokwingerd op droëland en olyfboorde op 2 ha.
Die oudste wingerd is ’n Chenin blanc, wat vermoedelik in 1926 geplant is. Daar is ook ’n blok uit 1963. Die jongste wingerde is al ’n stewige 15 jaar oud. Die kultivars, buiten Chenin blanc, is Viognier, Chardonnay, Shiraz, Pinotage, Mourvèdre, Sangiovese en Cabernet Sauvignon.
“Die wingerd is nog nooit besproei nie en danksy die diep wortelstelsels is dit gehard in die droogte. Ons spuit koper en swael met die hand. Ons gaan net een keer per jaar met ’n trekker in die wingerde in om die korogdekgewas in te werk en elke tweede jaar versprei ons mis deur die wingerde. Ek meen ’n wingerdstok hou nie van diesel nie, daarom is ons versigtig met masjinerie in die wingerd,” sê Johan, wie se hartstog oor wynbereiding aangevuur is deur al die uitstekende wyn wat hy al in sy leeftyd gedrink het.
“Ek het twee wyne geproe wat my heeltemal anders oor wyn laat nadink het. Dit