Redelikheid en ordentlikheid het nog nooit tweede gekom nie.
Om iemand ’n tweegesig te noem, is ’n baie onvleiende opmerking. Dit beteken jy moet so iemand liefs nie vertrou nie. Wanneer hy vandag vir jou ’n goeie gesig wys, beteken dit nie dat hy môre dieselfde sal doen nie.
Wyle dr. Koot Vorster het by geleentheid aan ’n groepie jong dominees gesê: “Broers, julle moet vir daardie man bid, maar wanneer julle bid, onthou om altyd die een oog oop te hou.”
Waarskynlik wou hy op sy kenmerkende manier sê dat sommige mense selfs nie onder gebed vertrou kan word nie!
Hierdie tweegesig-houding geld nie net vir individue nie. Daar is allerlei groeperings van mense wat vaardighede ontwikkel om dubbele rolle te vertolk. Iemand het selfs gepraat van straatengele wat ook huisduiwels kan wees. ’n Tyd gelede het ek tonele gesien wat twee totaal uiteenlopende gesigte aangebied het.
In die een geval was ’n groep studente besig om onder die opruiende slagspreuk “Fees must fall” dinge aan te vang wat jy nie van die sogenaamde “room van die jeug” sou verwag nie. Verenig deur die gemeenskaplike doelwit om deur geweld en plundering te verkry wat hulle as hul reg beskou, het hulle kosbare skilderye en boeke verbrand en geboue beskadig.
Dit was ’n aaklike gesig wat op die televisie vertoon is.
En toe, slegs ’n paar minute later, het ’n ander gesig verskyn. Weer was dit studente van allerlei rasse en gelowe wat verenig het – om die mooiste koormusiek en sang aan te bied. Onder die vaandel van Varsity Sing het hulle vriendelik en glimlaggend ’n vertoning gegee wat die droom van ’n nuwe, verenigde Suid-Afrika na ’n haalbare moontlikheid laat lyk het. Dit was pragtig.
Twee gesigte op dieselfde kampus, en êrens moet jy ’n standpunt inneem. As jy ’n goeie saak het, dien dit met ’n goeie gesig en jy sal die simpatie en ondersteuning van vele verdien. Redelikheid en ordentlikheid het nog nooit tweede gekom nie. Dit is goeie advies om te onthou.