DIEANDERSÊ
Die pluimveebedryf werk hard om ’n 30%-invoertariefverhoging op hoendervleis, ’n stapelvoedsel in baie huishoudings, in te stel om 5 000 werkgeleenthede te red. Dr. Neva Makgetla, ’n senior navorser van die konsultantegroep Trade & Industrial Policy Strategies, sê so ’n tarief is egter heeltemal onredelik.
Hoender is een van die min basiese kossoorte wat nie oor die afgelope 15 jaar groot reële prysstygings getoon het nie. Van 2002 tot 2015 het hoenderpryse saam met inflasie gestyg, terwyl kospryse in geheel met 28% meer as inflasie gestyg het. Stygende invoer het gehelp om pluimveepryse laag te hou, wat hoender meer toeganklik maak vir arm huishoudings. Hoender-invoer het gestyg van 7% van alle gebruik in 2002 tot 18% in 2015. Aangesien die meeste ingevoerde, bevrore hoenderstukke in lae-inkomste-gemeenskappe verkoop word, is die voordele vir arm huishoudings groter as wat die totale syfers te kenne gee.
Suid-Afrika se hoender-produksiekoste is kommerwekkend hoog vergeleke met ingevoerde hoendervleis. Mielies en sojabone is die belangrikste voerbronne en net vier maatskappye beheer 75% van alle meulens wat mielies maal. Net drie maatskappye verteenwoordig 75% van die opbergingsvermoë. Vyf supermarkkettings oorheers die kleinhandel.
Dié hoë mate van konsentrasie in die waardeketting lei tot ondoeltreffendheid en woekerwins.