GOEIE REËN BRING HOOP VIR LEË DAMME
TERWYL boere hul kop in dankbaarheid laat sak vir die goeie reën wat in die afgelope maand oor Suid-Afrika se somerreëngebied uitgesak het, is daar gebiede waar boere nog nie heeltemal uit die moeilikheid is wat watertekorte betref nie.
Met net 21% water is die vlak van die Tzaneendam, wat die sitrus- en subtropiesevrugte-produksiegebiede van Tzaneen en Letsitele bedien, steeds kommerwekkend laag.
“Danksy die goeie reën lyk ons oeste da- rem goed,” sê mnr. Pieter Vorster, voorsitter van Agri Letaba.
Hy hoop dit reën in die volgende twee tot drie maande genoeg dat plaasdamme en die groot opgaardamme in die gebied vol genoeg sal word om boere deur die wintermaande te dra. “Dit kan nog betyds reën om die Tzaneendam se vlak genoeg te laat styg vir die winter,” sê hy.
Hy voeg by dat ál die damme stroomop van dié dam nou vol of na aan vol is. Dit beteken die water wat nou uit die berge in die Letabarivier afkom, gaan in die Tzaneendam eindig.
LOSKOP LYK GOED
Ander belangrike damme waarvan die vlakke nog baie laag is, is die Nzheleledam tussen Musina en Louis Trichardt (15,9%), die Flag Boshielodam naby Marble Hall (28%), die Middel-Letabadam (21,2%), die Klipkopjesdam (23%), die Kwenadam (34,9%) en die Ohrigstaddam (21,5%).
Mnr. Robert Davel, uitvoerende hoof van Agri Mpumalanga, sê die meeste plaasdamme in dié provinsie is taamlik vol, maar hy is bekommerd oor die lae vlak van damme, soos die Kwenadam, wat boere in die Onderberg-omgewing deur die winter moet dra.
Volgens mnr. Piet Engelbrecht van Agri Limpopo is die Loskopdam darem reeds op 57% en daar is nog ’n taamlik sterk invloei.
“Die tafeldruifboere het ’n goeie oes gehad. Die tabak lyk goed, en so ook die sitrus aan ons bome.”
Davel sê damme wat Mpumalanga se Hoëveld bedien, lyk goed, en so ook riviere en damvlakke om Witrivier en Hazyview.