Grootfontein-veearts terug in sy pos
DR. JOHAN VAN ROOYEN, ’n spesialis-veearts by die Landbou-ontwikkelingsinstituut Grootfontein, keer op 23 Januarie terug werk toe ná ’n skorsing van ses maande en ’n uitmergelende dissiplinêre proses waarteen hy tans appèlleer.
Van Rooyen is verlede Julie geskors hangende verskeie dissiplinêre klagtes. Hy is vir die duur van sy skorsing verbied om enige werk te doen, wat konsternasie veroorsaak het in die plaaslike boerderygemeenskap.
Hy is intussen skuldig bevind aan vyf klagtes en is drie geskrewe waarskuwings opgelê. Sy posvlak is ook verlaag, ofskoon dit nie duidelik is wat sy nuwe pos sal wees nie.
“Dit was ’n besonder frustrerende en moeilike tyd,” sê Van Rooyen, wat nege vakke per semester by Grootfontein aanbied.
Sy skorsing hou skynbaar verband met ’n magstryd tussen die vakbonde Public Servants Association (PSA) en Nehawu. Van Rooyen is die plaaslike voorsitter van die PSA en sy lede bestuur ’n groot deel van Grootfontein se akademiese program.
ONDERSOEK
Van Rooyen is deels geskors omdat hy op 19 Julie verlede jaar lede van die PSA aangesê het om hul samewerking te weerhou van ’n taakspan van die Departement Landbou, Bosbou en Visserye wat die finansiële bestuur van trusts wat van Grootfontein se kuddes besit, ondersoek het.
Hy het aangedui dat hy geen probleem met die ondersoek gehad het nie, maar dat hy PSA-lede afgeraai het om deel te neem omdat hy nie besonderhede van die ondersoek ontvang het nie. Nadat hy egter dié inligting Van Rooyen is skuldig bevind daaraan dat hy beweer het me. Mmapitso Mashele, die departement se personeelhoof, trek Nehawu-lede voor; dat hy mnr. Philemon Ngala, ’n Nehawu-amptenaar, ná sy skorsing gevra het of hy nou gelukkig is; en verskeie mense by die departement gekontak het sonder toestemming van die departement se korporatiewe hoof en direkteur-generaal. Hy is ook daaraan skuldig bevind dat hy private werk sonder toestemming gedoen het.
Van Rooyen het teen dié bevinding en sy “onwettige skorsing” geappèlleer.
Mnr. Doug Stern, voorsitter van Agri OosKaap, sê die aangeleentheid is kommerwekkend en behoort ondersoek te word. “Ons studente by Grootfontein, sowel as die groter landbougemeenskap, word nadelig geraak daardeur.”