SENSEED ’N NUWE TELG VAN SENSAKO EN VKB
TWEE SUID-AFRIKAANSE swaargewigte, die saadmaatskappy Sensako en die landboumaatskappy VKB, het verlede Maandag in die Oos-Vrystaat kragte saamgesnoer.
Senseed, ’n gesamentlike onderneming waarin VKB en Sensako gelyke aandele besit, is saam met die amptelike opening van Sensako se nuwe saadaanleg op die maatskappy se proefplaas buite Bethlehem bekend gestel.
Die nuwe vennootskap is daarop gemik om beter op die belange van die Suid-Afrikaanse boer te konsentreer, sowel as om beter bemarking deur die nuwe aanleg te bewerkstellig, het die twee maatskappye in ’n gesamentlike verklaring gesê. VKB sê in die verklaring hy streef daarna om alle produksiemiddele aan sy klante te voorsien. Saad is een van die groot insette wat boere se winsgewendheid bepaal.
Sensako het op sy beurt sedert die 1950’s ’n stewige reputasie met die teling en genetiese verbetering van graangewasse opgebou. Sedert dié maatskappy homself in 2008 opnuut bekend gestel het, het hy sy tradisionele klem op koring ook na hawer, gort, rog, mielies, sonneblomme en sojasaad uitgebrei.
NUWE HOOFSTUK
Sensako meen hy is nou gereed om sy reeks kommersiële produkte in die afsienbare toekoms na hierdie gewasse uit te brei. Heelwat is reeds te koop.
Mnr. Andries Theron, ondervoorsitter van Graan SA, het na die nuwe vennootskap en aanleg verwys as die inleiding tot ’n nuwe hoofstuk wat oor die Suid-Afrikaanse graanbedryf geskryf word.
Hoër opbrengste, en dus genetiese ontwikkeling en navorsing, is wat die verskil gaan maak om dié bedryf se oorlewing te verseker, het hy gesê. “Niks gaan bly soos dit was nie, en die heel gevaarlikste sal wees om in ’n gemaksone te verval.”
Theron het ernstig teen politieke inmenging in navorsing gewaarsku. “Die politiek moet uit navorsing gehaal word, anders gaan ons dít wat ons reeds het, ook nog verongeluk,” het hy gesê.
“Ons móét tog vorentoe beweeg. Ons kan nie bekostig om te stagneer nie. En om vorentoe te gaan, moet ons in staat gestel word om ons boerderye en besighede (met verbeterde tegnologie) volhoubaar te bedryf.”
Theron het bygevoeg dat hy steeds vas glo die toekoms van Suid-Afrika lê in die landbou en sal in die landbou bly.
‘Die politiek moet uit navorsing gehaal word, anders gaan ons dit wat ons reeds het, ook nog verongeluk.’