Regering, bedryf byeen oor krisis
DIE pluimveebedryf is optimisties dat hy saam met die Regering ’n oplossing vir sy benarde situasie kan vind. Mnr. Kevin Lovell, uitvoerende hoof van die Suid-Afrikaanse Pluimveevereniging (SAPV), sê die eerste vergadering op 17 Januarie tussen die bedryf en die staat het goed verloop.
“Albei partye kon hul interpretasie van die situasie gee,” sê Lovell.
Verteenwoordigers van onder meer die Departement van Handel en Nywerheid en van Landbou, Bosbou en Visserye het die vergadering bygewoon.
Die vergadering is deur ’n groot groep mense bygewoon en ’n kleiner groep is aangewys om binnekort weer te vergader en die proses verder te voer. Lovell sê die partye het ooreengekom dat oplossings gevind moet word wat prakties is en strook met die reëls van die Wêreldhandelsorganisasie.
Die vergadering volg nadat afleggings en moontlike verdere werkverliese in die sektor
wye mediadekking gekry het.
Vakbonde en politieke partye het ook by openbare debat oor die bedryf se situasie betrokke geraak. Die jongste toetreder was mnr. Julius Malema, EFF-leier, wat luidens mediaberigte vra dat ’n tarief van 50% op alle ingevoerde hoendervleis gehef word.
Malema vra terselfdertyd dat so ’n tarief ondersteun moet word deur werknemer-aandeleskemas sodat werkers 50% van alle hoenderproduksie-ondernemings kan besit.
Dr. Rob Davies, Minister van Handel en Nywerheid, het in Desember ’n voorlopige beskermende tarief van 13,9% op ingevoerde hoenderstukke aan die been uit die Europese Unie afgekondig.
Dit geld tot 3 Julie en die Kommissie vir Internasionale Handelsadministrasie (Itac) moet intussen ondersoek wat die uiteindelike beskermingstarief behoort te wees.
Die bedryf het die 13,9% as “te min, te laat” gekritiseer.
Mnr. David Wolpert, uitvoerende hoof van die Assosiasie van Vleisinvoerders en -uitvoerders (Amie), het in ’n meningstuk in Business Report gesê invoer verteenwoordig 14% van die totale hoendervleisverbruik en dat plaaslike pluimveebase eerder na hul sakeplanne moet kyk. Só kan hulle sikliese ongunstige weerpatrone teëwerk, gesonde balansstate handhaaf, doeltreffend meeding en werksekerheid vir hul arbeidsmag verseker. –
2
’n Kleiner groep is aangewys om weer te vergader en die proses verder te neem.