China kom kyk na beesvleisstelsel
CHINA vra dat Suid-Afrika sekere regulatoriese verbeteringe in werking stel voordat hy Suid-Afrika se versoek om beesvleis daarheen uit te voer, verder oorweeg.
’n Afvaardiging van die Chinese algemene administrasie vir gehaltetoesig, inspeksie en kwarantyn (AQSIQ) het Suid-Afrika van 9 tot 18 Januarie besoek as deel van Suid-Afrika se voorneme om beesvleis daarheen te kan uitvoer, het die Departement van Landbou, Bosbou en Visserye in ’n verklaring gesê.
Die Chinese afvaardiging het sekere voerkrale, slagplase, beesvleisverwerkingsaanlegte, koue opbergingsgeriewe en toegangspunte tot die land besoek om die Suid-Afrikaanse beesvleisproduksiestelsel te beoordeel.
Die afvaardiging, gelei deur mnr. Zhao Zenglian, adjunkdirekteurgeneraal van die AQSIQ, was oorhoofs tevrede met die Suid-Afrikaanse stelsel, maar het verdere regulatoriese verbeterings geopper.
Die doel van die Chinese besoek was deels om samewerking rakende sanitêre en fitosanitêre kwessies te bespreek.
Die partye het ’n ooreenkomste aangegaan rakende meganismes om samewerking oor die kwessies te versterk. Hulle het ook die memorandum van verstandhouding oor diere-inspeksie en -kwarantyn by in- en uitgangspunte hersien en veterinêre maatreëls bespreek wat verband hou met die uitvoer van Suid-Afrikaanse beesvleis na China.
Die hersiende memorandum en veterinêre dokumente voortspruitend uit die besprekings is nog onderhewig aan regsoorweging deur albei partye. Daar was ook samesprekings tussen die Suid-Afrikaanse Landbounavorsingsraad en China se akademie vir inspeksie en kwarantyn.
Mnr. Mike Mlengana, direkteur-generaal van die Suid-Afrikaanse departement, het gesê hy is tevrede met die vordering wat in die besprekings gemaak is.
Hy het hom daartoe verbind om aandag te skenk aan die regulatoriese kwessies wat die Chinese afvaardiging geopper het ná raadpleging met die Suid-Afrikaanse beesvleisbedryf oor die aanbevelings. – 1