Noordwes en China praat oor donkievleis
DIE Noordwes-regering beoog om binnekort met ’n projek te begin om donkievleis na China uit te voer.
Mnr. Brian Setswambung, provinsiale hoof van kommunikasie in Noordwes, sê dié projek volg nadat mnr. Supra Mahumapelo, premier van Noordwes, en lede van die provinsiale raad verlede September na Beijing en Sjanghai gereis het om met potensiële beleggers te skakel.
Hy sê die projek is in ’n beplanningsfase. Die departement van landelike, omgewings- en landbou-ontwikkeling in Noordwes is betrokke by navorsing om die lewensvatbaarheid van die projek te ondersoek. Die departement beoog om volgende maand te vergader met opkomende boere wat belang stel daarin om donkies te lewer.
Verder ondersoek die departement ook die moontlikheid om ’n abattoir op te rig om die donkies te slag en te verwerk voordat die vleis en velle uitgevoer word.
“Ons wil verseker dat die regte kanale gevolg word sodat daar nie later kwessies met die nakoming van regulasies voorkom wanneer die projek in volle gang is nie. Die aanleg sal ook broodnodige werk verskaf aan ’n Op ’n vraag waarom die projek juis donkies pleks van beeste gebruik, sê Setswambung die vraag na donkievelle is besonder hoog in China.
“Hulle gebruik die velle om verskeie produkte te maak. Dit beteken dat ons die hele dier kan gebruik en nie net die vleis uitvoer nie.”
Mnr. Boeta du Toit, hoofbestuurder van Agri-Noordwes, sê daar is heelwat vrae oor die projek se volhoubaarheid.
“Daar word reeds ’n groot aantal donkies onwettig in die provinsie geslag, waarvan die velle na China uitgevoer word. Dit lei reeds tot bedenkinge oor die wettigheid van die projek.” Hy het ook ander bedenkinge.
“Donkies se draagtyd is 11-14 maande, wat hulle heeltemal onmededingend maak as vleisdiere. Hulle is ook kortgrasvreters wat weiding heeltemal verwoes en met vee meeding,” sê hy.
Verder is daar kommer oor die welstand van die diere. “Donkies word reeds in haglike omstandighede aangehou vir die uitsluitlike doel om hul velle te verkoop. Myns insiens gaan die projek hierdie probleem vererger.” Hy meen ook daar moet gevra word hoe rym die projek met die land se voedselsekerheidsdoelwitte en met landboubeleid.