OM TE BEWERK OF NIE . . .
Wanneer is dit tyd om ’n geenbewerkingsland te bewerk?
’n Artikel op die webwerf van die Staatsuniversiteit van Ohio in Amerika se gerespekteerde landbouvoorligtingdiens het hewige kritiek uit geenbewerkingkringe in dié land ontketen. In die artikel word vier probleme aangedui wat in geenbewerkingslande kan ontstaan en met bewerking opgelos kan word, naamlik siektes, insekte wat op oesreste oorleef, onkruid en dreinering.
Dr. Ryan Stockwell, senior bestuurder van die National Wildlife Services se landbouprogram, sê in sy reaksie dat hy, as die seun van ’n afslaer, boerdery na boerdery sien misluk het weens skuldlaste van die verlede wat opgebou het.
“Uiteindelik moet elke lening betaal word, met rente. Die skrywers (van die Iowaartikel) het korttermynvoordele van bewerking uitgewys, maar die uitwerking van gronderosie en verswakkende grondgesondheid op produksie oorgesien,” sê Ryan.
Hy wys daarop dat die voordeel van bewerking in party gevalle, soos vir dreinering, so kortstondig as enkele weke kan wees. Daarna kan die dreineringsprobleem weens ’n verlies aan grondstruktuur, erosie en verkeer oor die land selfs groter as voorheen wees.
“As jy enige plaas se kontantvloeiprobleem wil oplos, kan ’n korttermynlening altyd help. Maar uit die perspektief van die winsgewendheid op lang termyn van ’n boerdery kan die terugbetaling van lenings met rente uit die verlede ’n plaas se lewensvatbaarheid verwoes, veral as jy nie ’n manier kan vind om die plaas op sy eie winsgewend te maak nie.”
Oor die gevolgtrekking van die vyf Iowaartikelskrywers dat bewerking gebruik kan word om patogene organismes en insekte onder beheer te bring, wys meer as een kommentator, onder wie Ryan, daarop dat daar ook nuttige insekte is wat plae kan bekamp.
“Bewerking maak hulle dood. Wisselbou behoort eerder ingespan te word om sulke probleme op te los.
“Kom ons hou op om te probeer om bewerking te laat doen wat dit nie kan nie: Om patogene organismes en insekte te bekamp wat oor jare van kort rondes wisselbou opgebou het. Dit maak nie saak of jy bewerk of nie, as jy jaar ná jaar mielies met mielies opvolg, gáán jy probleme hê. Plae kry dit selfs deesdae reg om ’n mieliesojaboonwisselboustelsel te klop. Ons moet meer kompleks raak deur meer gewasse by te voeg.”
Me. Laura Barerra, besturende redakteur van die tydskrif No-Till Farmer, skryf sy wil nie stry of bewerking die probleme kan help oplos of nie. “Maar hoekom nie eerder moontlike oplossings soek wat geenbewerkers toelaat om hul stelsels bewerkingvry te hou nie? Dit is hierdie soort artikels wat sommige boere bang maak of ontmoedig om geenbewerking in die eerste plek te beproef.”
Sy sê dekgewasse, ’n diverse wisselboustelsel en ’n kombinasie van chemiese middels met verskillende werkings is alternatiewe maniere om ’n onkruidprobleem weens geenbewerking op te los.
“Ek besef geenbewerking is nie ’n perfekte praktyk nie. Bewerking kan soms nodig wees om ’n spesifieke probleem op te los, maar dit moet as die heel laaste uitweg beskou word, nadat alle ander bestuursopsies getoets is en misluk het,” skryf sy. http://agcrops.osu.edu (goo.gl/ hcKzm2); www.no-tillfarmer.com (goo.gl/bvtVfh).