Gautenger voer botoon met mielies
’n Opbrengs van 11,11 ton mielies per hektaar op droëland is nie te versmaai nie, wat nog te sê in die afgelope dorre somer se moeilike toestande. Danksy presisieboerdery het mnr. Bernard Rabé van Fochville se opbrengs met 15% verbeter – en dié ekstra uit
Sedert mnr. Bernard Rabé meer as tien jaar gelede na presisieboerdery en kort daarna na geenbewerking oorgeslaan het, pas alles in dié familieboerdery by Fochville soos ’n legkaart in mekaar. Nie net is die opbrengs van al sy gewasse hoër nie, maar die koste van duurder toerusting word binne twee tot drie jaar verhaal.
Bernard, wat die eerste prys vir die hoogste mielie-opbrengs op droëland in die westelike produksiegebied van Suid-Afrika in DuPont Pioneer se eerste Weeg en Wen-opbrengskompetisie gewen het, boer saam met ’n span op die plaas Tweefontein by Fochville in Gauteng. Sy hoofgewas is wit mielies, wat hy met sojabone en sonneblomme afwissel. verbou sy gewasse in ’n stelsel van geenbewerking; alles onder droëlandverbouing.
Bernard dien in die bestuur van die familie-onderneming Rabé-boerdery, wat benewens akkerbou ook uit kommersiële beeste en eierproduksie bestaan. Die boerdery was in 2006 Landbouskrywers SA se Gautengse Boer van die Jaar en ’n finalis vir nasionale Boer van die Jaar. Dieselfde jaar was Bernard se broer, Albert, die TLU SA se Jongboer van die Jaar.
FINANSIËLE ONTLEDING
Om seker te maak hy is op koers met die regte gewasse en dat hy winsgewend boer, doen Bernard elke jaar ’n finansiële ontleding saam met Senwes se graanontledingspan om die winsgewendste gewasse te bepaal. Hy kan hom dan ook aan die ander deelnemers meet.
In die vorige somer (2015-’16) was wit mielies sy winsgewendste gewas en dit was ook die gewas waarby boere by Fochville geldelik die meeste baat gevind het. In 2014-’15 was sonneblomme die winsgewendste gewas en in 2013-’14 het sojabone die botoon gevoer.
“Die prys van jou graan en die verspreiding van die reën speel ’n groot rol in winsgewendheid. Dit is natuurlik ook belangrik om jou oes op die regte tyd te bemark, want ’n boer moet probeer om die hoogste pryse te kry,” sê Bernard, wat die graanbemarkingsdienste van Senwes en ’n private bemarker, Dalevest in Potchefstroom, gebruik.
PRESISIEBOERDERY
Bernard het in 2004 met presisieboerdery begin. Eerstens het hy grondontledings gedoen en die resultate gebruik om grondkaarte op te stel. Toe het hy ’n Radiumkalkstrooier met die samewerking van Senwes aangepas om in sy behoeftes te voorsien.
Kalk word volgens ’n vyfjaarsiklus op die saailande toegedien aan die hand van grondontledings om die pH optimaal te hou – laag op swaar grond en hoër op rooigrond, met ’n goue middeweg van 5,5. RegstellenHy