Hoë opbrengste in Kaapse graanproewe
BESONDER goeie opbrengste is vanjaar in die meeste gewasproewe van die departement van landbou in die Wes-Kaap behaal.
Dr. Johann Strauss, wetenskaplike in volhoubare produksiestelsels en bewaringslandbou by dié departement, sê hy is veral opgewonde oor die uitslae van die nuwe wisselbouproef wat vanjaar op die navorsingsplaas Langgewens buite Moorreesburg begin het.
’n Gemiddelde koringopbrengs van 4 t/ha is behaal. Die beste land het net minder as 5 t/ha gelewer. Moutgars is vanjaar die eerste keer in die Swartland geplant en ’n beste opbrengs van 4,9 t/ha is behaal. Die gemiddelde opbrengs oor die hele proef was 4,4 t/ha.
Strauss sê die hoogste kanola-opbrengs was 2,9 t/ha, terwyl die proef gemiddeld 2,1 t/ha gelewer het. Die gemiddelde haweropbrengs was 2 t/ha, terwyl lynsaad se gemiddelde opbrengs 1,3 t/ha was. Hy sê al is die koring eers in die laaste paar dae van Mei geplant, het hulle goeie reën tot September gekry en was dié maand boonop betreklik koel.
Die peulgewasse het nie waffers gevaar nie. Fababoonopbrengste was tot 1,5 t/ha en by die wieke is gemiddeld 500 kg/ha geoes. Strauss is nie te bekommerd daaroor nie, want die oesproses is bemoeilik omdat die fababone so laag gegroei het. Wieke se koste is laag en die pitte kan teen sowat R30/kg verkoop word.
Die proef wat tien jaar lank bedryf word en waarvoor ’n skyfplanter gebruik word, sluit drie stelsels met verskillende mates van gewasdiversiteit in, naamlik stelsel 1: 50% koring, 30% kanola en twee dekgewasse (mengsels van graan- en peulgewasse); stelsel 2: 50% koring, 10% kanola, 10% fababone, 10% wieke en 20% dekgewasse; stelsel 3: 30% koring, 10% gars, 10% hawer, 20% dekgewasse, 10% kanola, 10% fababone en 10% lynsaad.
Die persentasies dui die aantal jare uit tien aan wat ’n sekere gewas geplant gaan word. Strauss sê egter dat die proefplan toelaat dat die opvolging van gewasse aangepas kan word, soos dit in boerderye gebeur.
SUID-KAAP
Gewasse het ewe goed gevaar in die wisselbouproef op ’n private plaas naby Riversdal. Alle gewasse in die proef is met ’n skyfplanter geplant.
Die gewasse in die proewe op Tygerhoek en ’n private plaas naby Swellendam is met ’n tandplanter geplant.
VROU LEI NAMIBIESE JAGTERS