WOESTYNVRUG KRY GOUE STATUS
VAN die Kaliforniese woestyn tot Suid-Afrika se Namakwaland floreer ’n groeiende dadelbedryf danksy die wêreldwye toenemende verbruikersneiging in die rigting van gesonder kos.
Die bekende ZZ2-boerdery, wat onlangs dié bedryf betree het, beoog om van Maart af sy eerste dadeloes in groot volumes te begin pluk. Hulle het die laaste paar jaar op groot skaal palmboorde in die Karas-gebied in Namibië se suide aangeplant.
Die Karsten-groep is Suid-Afrika se grootste dadelprodusent – aan die ander kant van die Laer Oranjerivier in die Klein-Pella-gebied.
ZZ2 wil vanjaar se oes meestal plaaslik op varsproduktemarkte verkoop. Die Karsten-groep bemark plaaslik én in die uitvoermark. Dié groep bedryf onder meer verpakkingsaanlegte in Egipte.
Intussen word uit Kalifornië berig hoeveel miljoene dollar dadels deesdae daar geoes word. Die Coachella-vallei voorsien nagenoeg 95% van alle dadels wat in Amerika verbou word, berig die plaaslike koerant
Een van die grootste dadelprodusente daar is Woodspur Farms, wat organiese vurgte verbou.
Woodspur verpak en bemark nie net die heel vrugte nie, maar verwerk dit ook in bestanddele, soos dadelstroop en -pasta, asook gekapte dadels wat in kommersiële produkte, soos gladdejantjies (“smoothies”) en energiestafies, gebruik word.
— http://desert.sn/2i7UE7X