GWK-HOË WORD TIGER SE GRAANBAAS
MNR. PIETER SPIES (foto) het sy pos as besturende direkteur van GWK vir dié van Tiger Brands se hoof van grane verruil.
Hy het die landbouprodusent-beheerde GWK die afgelope drie jaar tot nuwe hoogtes gevoer, veral wat vertikale uitbreiding in die voedselketting betref. Tiger Brands, SuidAfrika se grootste voedselmaatskappy, het aangekondig Spies sal op 1 Februarie by hulle aansluit. Intussen neem mnr. Pieter Bekker, uitvoerende hoof van GWK, in Spies se plek waar.
Mnr. Frank Lawrence, voorsitter van GWK, het intussen benadruk dat hulle vol vertroue is dat die maatskappy oor ’n bekwame span leiers en die regte strukture beskik om onverpoos aan te hou om sy beplande strategieë in werking te stel.
“Die besturende direkteure van GWK se drie bedryfseenhede het duidelike rigting. Die raad vertrou dat hulle, soos in die verlede, sal aanhou voortbou op die suksesse en goeie werk wat daar verrig word.”
REKORDJAAR
Lawrence het Spies ’n inspirerende leier genoem, en gesê GWK is spyt oor sy vertrek, maar verstaan dat dit vir hom ’n groot geleentheid is.
Hulle het reeds met die proses begin om ’n geskikte nuwe leier in sy plek aan te stel.
GWK het verlede jaar sy omset met 11,2% tot R8,34 miljard verhoog, een van sy beste boekjare tot op hede. Sy netto wins tot einde Mei verlede jaar was ondanks die ernstige droogte R148 miljoen. Dit was ook ná aansienlike besteding aan infrastruktuur en die vestiging van nuwe bedrywe, soos hul Farm Foods-fabriek en -meule by Modderrivier in die Noord-Kaap, wat pasta, meel en koekies aan die kleinhandel lewer. Dié aanleg word as die landboumaatskappy se grootste belegging tot op hede beskou.
Tiger Brands is een van die top-maatskappye op die Johannesburgse beurs, en spog met ’n verspreidingsnetwerk wat oor meer as 22 Afrika-lande strek.
Sy graan-afdeling sluit verskeie handelsmerke van onder meer brood, mieliemeel, koringmeel, rys en hawermout in.