SÓ SAL ONS DIE AFRIKANER ONTHOU
’n Rasegte Afrikanerbees met wye weglêhorings bly nou maar eenmaal ’n lus vir die oog. Daar is seker nie ’n trotser dier nie. As ’n klein seuntjie het dié mooi, rooi beeste my altyd gefassineer. Waar ek hulle ook al gesien het, het ek hulle bewonder: Op skoue, langs die nasionale paaie en grondpaaie van Suid-Afrika, in landbou tydskrifte ... noem maar op. Nie eens die Krugerwildtuin se Vyf Grotes kon my liefde vir Afrikanerbeeste ewenaar nie!
Die Afrikanerbees is mos ’n tradisie. Hoe het die ossewaens dan in die verre noorde gekom? Ons sal altyd Afrikanerbeeste onthou vir hul karakter, sierlikheid en houding; beeste met ovaalvormige voorkoppe, pragtige, regop skowwe en wye weglêhorings met ’n naat aan die onderkant. Trots, edel en adel.
Só het ons voorgangers Afrikanerbeeste geteel en só moet ’n Afrikanerbees lyk. Daarom is dit hartseer dat sommige telers Bonsmaragene in hul kuddes begin inbring het. Tydens die Afrikanerbees-ekspo in Augustus op die Jakarandaskou in Pretoria was ek stomgeslaan toe ek sien hoe sommige van die hedendaagse “Afrikanerbeeste” lyk. Trouens, by sommige van die krale moes ek lank stilstaan om myself te probeer oortuig dat dit Afrikanerbeeste was wat voor my gestaan het. Stomgeslaan om te sien hoe infusie met Bonsmaragene ons geliefde Afrikanerras byna vernietig het.
Hoekom wil jy jou Afrikanerbeeste met Bonsmaras vermeng? Hoekom teel dié telers dan nie eerder rasegte Bonsmaras nie? ’n Afrikanerbees wat met Bonsmarabloed vermeng is, kan tog nie meer as ’n Afrikanerbees erken word nie. Daardie beeste het ’n knou weg. Al word hul nageslag weer met Afrikanerbulle gepaar, sal dit nooit rasegte beeste wees nie.
Waar was die telers se deursettingsvermoë en ywer dan?
Rasegte Afrikanerbeeste met die regte eienskappe is wel te vinde in die bedryf. Dit is baie verblydend dat alle telers nie “infusiemal” geraak het nie. Tydens die ekspo is daar ook beeste vertoon van telers wat nie die suiwerheid van hul kuddes wou opoffer nie; mense met ’n passie vir hul rasegte Afrikanerbeeste. Julle maak ons so trots soos die ras self.
Spesiale dank en erkenning aan oom Pieter van der Walt en sy seun Tjaart van die Wegdraai-boerdery in die Bosveld met hul indrukwekkende Afrikanerosse. Ook die groot advertensieborde van gespierde bulle en mooi, vroulike koeie (almal met weglêhorings) het beïndruk.