Gesels saam oor volstruise

Die volgende episode van die jongste Nasie in Gesprek-televisiereeks gee kykers die kans om die volstruisbedryf beter te leer ken.

In episode 6 op kykNET (DSTV-kanaal 144; eerste uitsending op Woensdag, 8 Februarie) kuier die span op Oudtshoorn in die KleinKaroo en gesels oor die verskillende produkte wat volstruise lewer, die bedryf se bydrae tot die plaaslike ekonomie en hoe volstruisplase toerisme bevorder.

Onderhoude met bedryfsleiers, soos mnre. Piet Kleyn, uitvoerende hoof van die Volstruisbesigheidskamer, en Charl du Plessis, besturende direkteur van Klein Karoo Internasionaal, vertel meer oor die probleme en suksesse van die volstruisbedryf.

Twee boere van die omgewing, mnre. Laubscher Coetzee van die plaas Klipheuwel en Joey Potgieter van die plaas Welbedag, vertel ook hoekom hulle so graag met volstruise boer.

Chris Burgess, redakteur van Landbouweekblad, bied sy perspektief oor die veelsydigheid van volstruise en die produkte wat die bedryf lewer. Hy gesels ook oor die impak van die 2011-voëlgriepepidemie en hoe die bedryf dié krisis oorleef het.

Die ateljeegas is me. Nobri Booyzen, projekbestuurder van Exotic Leather SA. Benewens die gesogte volstruisleermark gesels sy ook oor krokodilleer.

SINVOLLE GESPREKKE

Die reeks word in Engels en Afrikaans op kykNET, Business Day TV en Soweto TV uitgesaai. Die aanbieders is Theo Vorster (Galileo Capital), Rozanne McKenzie (Jacaranda FM) en Mpumelelo Mkhabela (voormalige redakteur van die dagblad Sowetan).

BORGE

Nasie in Gesprek word moontlik gemaak deur Senwes en die medeborge Monsanto, Nedbank, Hinterland, Afgri, NWK en Imperial Isuzu. Landbouweekblad is die mediavennoot.