AANDELE VIR BOERE IN CLOVER SE NUWE MELKMAATSKAPPY

BOERE wat melk aan Clover lewer, sal aandele in Clover se nuwe maatskappy, Dairy Farmers South Africa (DFSA), kan hê.

Die maatskappy het in ’n handelsverklaring meer besonderhede oor DFSA gegee. Hy het vroeg in Desember sy planne vir dié herstrukturering bekend gemaak.

Sowat 75% van die aandele in DFSA sal op of ná 30 Junie vanjaar aan boere beskikbaar gestel word, na gelang van hoeveel onverwerkte melk hulle in die afgelope drie jaar aan Clover gelewer het. Die oorblywende aandele sal aan Clover behoort.

Die DFSA sal sy eie onafhanklike direksie van nege direkteure hê, waarvan twee Clover sal verteenwoordig.

Clover sê die rede waarom hy herstruktureer, is omdat hy sy blootstelling aan die sikliese aard van sy laemargesake wil uitskakel – vars melk waarby daar nie waarde toegevoeg is nie, ultra-gepasteuriseerde melk en ultra-hoëtemperatuurmelk.

Sy hoëmargesake sluit vla, jogurt en babaprodukte in.

PRYSBEPALING

Clover sê een van die doelwitte met die herstrukturering is om wanopvattings uit die weg te ruim oor hoe die prys van onverwerkte melk bepaal word.

“Daar is ’n wanopvatting by kapitaalmarkbeleggers en ander markdeelnemers dat Clover met die vasstelling van die prys vir onverwerkte melk produsente kan bevoordeel ten koste van winsgewendheid.

“Daar is dan ook ’n wanopvatting by produsente dat Clover met die vasstelling van die prys van onverwerkte melk winsgewendheid verbeter ten koste van produsente.”

Die herstrukturering sal daartoe lei dat DFSA die prys van onverwerkte melk bepaal, nie Clover nie. DFSA sal die prys bepaal wat boere kry, asook die prys waarvoor hy die melk aan derde partye verkoop. DFSA sal onverwerkte melk aan meer as net Clover mag verkoop.

“Dit sal daartoe lei dat die prys van onverwerkte melk onomwonde deur markkragte bepaal sal word,” sê Clover in die verklaring.

Clover sal melk by die DFSA koop teen die gemiddelde nasionale prys waarteen DFSA dit by boere koop.

Die stigting van DFSA sal dit vir Clover moontlik maak om hom toe te spits op sy hoëmargesake. DFSA sal hom toespits op die najaag van volume in die laemargesake.

Groter volume in laasgenoemde sal tot Clover se voordeel strek omdat sy bestaande infrastruktuur daarvoor gebruik sal word en DFSA Clover sal betaal vir dienste gelewer.

Clover sê hy gaan die laemargesake teen ’n nominale bedrag aan DFSA oordra. Dit sluit alle leweringsooreenkomste in wat Clover met boere het. “Produsente se posisie behoort onveranderd te bly,” lui die verklaring.

–

‘Die herstrukturering sal daartoe lei dat DFSA die prys van onverwerkte melk bepaal, nie Clover nie.’