MINIMUM LOON GELD VANAF 2018
’N NASIONALE minimum loon van R20 per uur sal na verwagting volgende jaar vanaf 1 Mei geld.
Adj.pres. Cyril Ramaphosa het die loon op 8 Februrarie afgekondig ondanks die feit dat die vakverbond Cosatu geweier het om die ooreenkoms wat die loon vasstel, te onderteken.
Geen werker in SuidAfrika sal onder hierdie absolute minimum mag betaal word nie. Mense wat 40 uur per week werk, sal R3 500 per maand verdien. Dié wat 45 uur per week werk, sal R3 900 per maand verdien.
Die Regering sien die loon as ’n meganisme om ongelykheid in inkomste te verminder.
Vir die landbou geld 90% van dié loon, oftewel R18 per uur, R2 880 vir 40 uur per week en R3 240 vir 45 uur per week.
Ramaphosa het benadruk dat die nuwe minimun loon nie ’n menswaardige loon is nie. Dit is egter ’n beginpunt om die lewens van sowat 6,6 miljoen werkers te verbeter.
’n Nasionale Minimumloonkommissie sal gestig word en jaarliks die loon hersien en aanpas met inagneming van “die impak van die vlak van indiensneming, armoede en ongelykheid”.
“Ondernemings wat dit nie kan bekostig om die nasionale minimum loon te betaal nie, kan aansoek doen om kwytskelding van tot 12 maande. Kwesbare ondernemings sal vir bystand oorweeg word binne die beskikbare mid dele, waaronder aansporings.”
Die onderhandelingsvennote het ’n ooreenkoms oor kollektiewe bedinging en stakings onderteken en hulle daartoe verbind om geweld, intimidasie en eiendomskade te voorkom.
Ramaphosa het ontken daar is onmin tussen die Regering en Cosatu ná die vakverbond se versuim om die ooreenkoms te onderteken.
Die ondertekening sou twee dae voor pres. Jacob Zuma se 2017staatsrede geskied by ’n ete met sakeleiers en die georganiseerde arbeid in Kaapstad sodat Zuma die loon by sy staatsrede kon afkondig.
’n Cosatuwoordvoerder sê die ooreenkoms sal eers ná sy uitvoerende komiteevergadering einde Februarie onderteken word.
‘Enige kwesbare onderneming wat dit nie kan bekostig nie, sal vir bystand oorweeg word.’