KORINGPRYS NOG LANK ONSEKER
ONSEKERHEID oor die ekonomie en die gevolglike wisselvallige wisselkoers voorspel min goed vir die koringprys. Boonop het die onsekerheid oor die invoertarief op koring moontlik daartoe gelei dat die meeste koring in die geskiedenis in 2015-’16 ingevoer is.
Dr. Dirk Strydom, bestuurder van graanekonomie en -bemarking by Graan SA, het op Graan SA se streekvergaderings op Rietpoel en Moorreesburg gesê markte reageer op bekommernisse oor politieke onsekerheid en oor gerugte oor kabinetskommelinge.
“Die moontlikheid dat Suid-Afrika se beleggingstatus afgegradeer kan word, is nog nie weg nie. As ons nie ekonomiese groei kry of die beloftes nakom wat aan die kredietgraderingsagentskappe gemaak is nie, bly die risiko daar.”
Volgens Strydom is die koringsituasie “selfs meer deurmekaar”. Wêreldvoorraad van koring is hoog en met ’n eindvoorraad van 253 miljoen ton, sal die internasionale koringprys laag bly. “Dit is waar die invoertarief veronderstel is om in die prentjie te kom.”
VOORRAAD
Afgesien van ’n lae internasionale prys vanweë hoë koringvoorraad en ’n wisselvallige wisselkoers, is die meeste koring nóg, naamlik 2,06 miljoen ton, vanaf 1 Oktober 2015 tot 30 September verlede jaar ingevoer. Dit het onder meer veroorsaak dat Suid-Afrika net vóór oestyd ’n oordragvoorraad van 832 000 ton gehad het. Dit is genoeg koring vir 3,2 maande. Normaalweg hou die land voorraad vir 1,8 maande.
Strydom skryf die toename in ingevoerde koring toe aan die onsekerheid wat ná elke sneller van die invoertarief heers oor die afkondiging daarvan.
“Ons syfers wys skerp stygings in invoer elke keer ná so ’n sneller. Dit is omdat invoerders ’n gaping sien om goedkoop koring in te voer voor ’n nuwe, hoër tarief in werking tree.”
Hy het ook waargeneem dat Suid-Afrika se uitvoer “wegraak” – in 2015-’16 is net 68 000 ton koring na buurlande uitgevoer, teenoor 300 000 ton wat gewoonlik uitgevoer word.
SKEPE OP PAD
Hy sê daar sou ná oestyd selfs meer druk op die prys gewees het as daar nie ’n ooreenkoms gesluit is om die 300 000 ton koring wat tariefvry uit die Europese Unie (EU) ingevoer mag word, eers vanaf Februarie te land nie.
Strydom kon bevestig dat skepe met koring uit die EU op pad is. “Februarie gaan die aanbod van koring weer skerp styg, want almal is skrikkerig oor die tarief. Dit is ’n risiko vir ons. As dié 300 000 ton koring uitgewerk is, kan ons mark hopelik weer normaal funksioneer.”
Strydom sê die gebeure in die koringmark die afgelope paar maande het opnuut bevestig dat die rapportering van in- en uitvoer moet plaasvind.
“Dit sal help dat die hele mark besluite kan neem.”
Graan SA werk daaraan om markinligting meer geredelik beskikbaar te kry sodat beter besluite geneem kan word op grond van feite, nie gerugte nie. “Ons kan ons bedrywe net regkry as ons die regte inligting het en die regte besluite neem.”
‘Ons kan ons bedrywe net regruk as ons die regte inligting het en die regte besluite neem.’