TROEF NUWE KOMMANDOWURM SÓ
Die Departement van Landbou, Bosbou en Visserye het pas ’n tussentydse gids gepubliseer met riglyne vir die bekamping van die herfs-kommandowurm wat sedert middel Januarie in mielielande van Limpopo tot Noordwes en die Vrystaat opgemerk is. MARLEEN SMITH
is nutteloos om die herfs-kommandowurm te probeer bekamp as die larwes reeds mieliekoppe binnegedring het, want daar is hulle beskut teen chemiese middels, waarsku ’n tussentydse gids met bekampingsriglyne vir dié soort kommandowurm.
Die Departement van Landbou, Bosbou en Visserye het die gids met die hulp van verskeie kenners saamgestel, kort voor daar taksonomies bevestig is dat die wurmplaag wat boere van Limpopo tot Noordwes en die Vrystaat teister, wel die vernietigende herfs-kommandowurm is.
Die departement wys in die gids daarop dat geen chemiese middels nog in Suid-Afrika vir die bestryding van dié soort geregistreer is nie. Die raad aan boere is om middels te probeer wat vir die bestryding van ander Lepidoptera-soorte by mielies geregistreer is.
DIÉ MIDDELS WERK
Die aktiewe bestanddeel indoksakarb is getoets en het gewerk. Dit is by DuPont en Villa Crop Protection te kry. Die Du Pont-produk is vir gebruik by mielies geregistreer.
Dit lyk of lufenuron werk, maar dit is nie vir gebruik by mielies geregistreer nie. Produkte is by Villa Crop Protection, Meridian Agrochemical Company en Syngenta te kry.
Chlorantraniliprool is baie doeltreffend, maar neem kennis dat dit ’n diamied is en dus maklik tot weerstandigheid kan lei. Dit moet met groot omsigtigheid toegedien word en slegs die aantal kere wat op die etiket voorgeskryf word. Produkte is by DuPont en Syngenta te kry. ’n Produk wat teen stamboorders by mielies geregistreer is, is ook by Syngenta te kry.
Emamektien bensoaat is ook met sukses getoets, maar is nog nie vir gebruik by mielies in Suid-Afrika geregistreer nie. ’n Produk is by Syngenta te kry.
Spinosad is ook met gemengde sukses getoets, maar is ook nie vir gebruik by mielies geregistreer nie. Produkte is by Dow AgroScience en Efekto te kry.
Chlorpirifos is vir die bestryding van Lepi- doptera-soorte by mielies geregistreer, maar daar moet nog vasgestel word of die insekte daarteen bestand is of nie.
Thiodikarb is ’n karbamaat waarteen die insekte vermoedelik bestand kan wees. Doen dus eers vooraf ’n vinnige toets om vas te stel of dit doeltreffend is. ’n Produk wat vir gebruik by mielies geregistreer is, is by Bayer CropScience te kry.
Metomiel is vir gebruik by mielies geregistreer, maar is ook ’n karbamaat wat dus ook weens weerstandigheid ondoeltreffend kan wees. Produkte kan by Arysta LifeScience, Villa Crop Protection, Adama, Nulandis (Plaaskem), Cipla Agricare, DuPont en Bitrad verkry word.
Benfurakarb is vir gebruik by mielies geregistreer (saam met piretroïede), maar by hierdie aktiewe bestanddeel is daar ook die risiko van weerstandontwikkeling. Produkte is by Villa Crop Protection, Meridian Agrochemical-maatskappy en Dow AgroScience te kry.
Spuittoedienings van die bakterie Bacillus
thuringiensis (Bt) se kurstaki-serotipe kan ’n moontlike biologiese oplossing wees. Dit sal egter afhang van watter subtipe suksesvol teen die larwes ingespan kan word, asook die grootte van die larwes wanneer dit toegedien word. Geen middel is vir gebruik by mielies geregistreer nie. Produkte is by Valent BioSciences (Philagro), Villa Crop Protection, Becker Underwood, Agro-Organics en Plant Health Products te kry.
SPUIT BETYDS
Die gids beveel aan dat middels in die vroeë ontwikkelingstadia van die larwes toegedien word. Hoewel hierdie wurms meestal mielies aanval, kan dit ook van tyd tot tyd na onder meer koring, katoen en grondbone beweeg. Hou dus alle gewasse noukeurig dop.
Meer inligting, onder meer produkte se handelsname, is gratis op die CropLife SA-databasis beskikbaar (http://www.crop life.co.za/images/croplife/initiatives/Insecti
cidesAugust2016.pdf) of op die Agri Intel-databasis (www.agri-intel.com).