MEER LEEUS VERGIFTIG NÁ TROFEEVERBOD
DIT is sedert minder leeus in SuidAfrika gejag word dat leeus links en regs vergiftig word deur stropers wat net hul koppe en pote verwyder. Só sê me. Carla van der Vyver, uitvoerende hoof van die Suid-Afrikaanse Roofdiertelersvereniging (Sapa).
Die Amerikaanse agentskap vir vis- en natuurlewe het in Oktober verlede jaar ’n verbod aangekondig op die invoer van leeutrofeë en produkte van leeus wat in aanhouding geteel is. Die agentskap sê dit is omdat daar nie bewys kan word dat die jag van leeus wat in aanhouding geteel is, tot die bewaring van vrylopende, wilde leeus bydra nie.
Teen Mei verlede jaar is daar reeds drie voorvalle aangemeld van leeus wat vergiftig is voor hul koppe en pote afgesny is. Al drie voorvalle was in Limpopo.
SPESIFIEKE MARK
In Junie is drie Mosambiekse mans in ’n lokval by Giyani aangekeer toe hulle probeer het om leeupote en -koppe vir moetie te verkoop. Kort ná dié inhegtenisneming is nóg twee leeus in die omgewing van Marble Hall en Groblersdal vergiftig.
Daar is vanjaar reeds etlike leeus in Limpopo vergiftig, sê brig. Motlafela Mojapelo, polisiewoordvoerder. Sake is onder meer aangemeld by Hoedspruit, Mara en Polokwane. Drie leeus is tussen Polokwane en Mokopane vergiftig, nog drie by die Letaba River Lodge naby Tzaneen, en nog een op Alldays.
Van der Vyver meen die leeus word vir ’n spesifieke mark doodgemaak, waarskynlik plaaslik. “Dieselfde liggaamsdele word in ál die voorvalle op dieselfde manier verwyder.”
Sy glo die netwerk waardeur die leeus se koppe en pote gelewer word, is hoofsaaklik in Limpopo werksaam, want al is daar ander provinsies met meer leeus in aanhouding, is verreweg die meeste voorvalle in Limpopo.
ONDERSOEK
Volgens leeuboere wat slagoffers was, moes stropers spesifieke inligting oor hul boerderye gehad het. In een voorval is ’n spesialissekerheidstelsel maklik omseil.
Van der Vyver het nou ’n ondersoekspan aangestel om agter die kap van die byl te probeer kom.
“Ek meen die liggaamsdele van leeus was taamlik algemeen beskikbaar toe dié diere baie gejag is, maar sedert ons nie trofeë na Amerika mag uitvoer nie, word baie minder leeus gejag. Nou moet die gebruikers van hierdie produkte ander maniere vind om dit in die hande te kry. Dit kan uiteindelik ’n bedreiging vir wilde, vrylopende leeus ook inhou.”
Sy sê sy het begrip vir die behoefte om toe te sien dat die benutting van leeus in aanhouding tot bewaring bydra, maar waarsku dat geen handelsverbod nog ooit ’n bedreigde spesie kon red nie. “Dit help nie vir renosters nie en dit gaan ook nie Afrika se leeus red nie. Inteendeel.”
‘Dieselfde liggaamsdele word in ál die voorvalle op dieselfde manier verwyder.’