GESKIKTE KULTIVARS VIR CRADOCK
Daar is sowat 50 pekanneutkultivars om van te kies, maar doen vooraf goeie huiswerk oor watter by ’n bepaalde omgewing sal aanpas en goeie kruisbestuiwing verseker. Die Cloetes het welslae behaal met die onderstaande kultivars.
■ Wichita. Dié kultivar is goed aangepas in die meeste verbouingstreke, lewer ’n hoë opbrengs van meer as 2 ton/ha, kom vroeg in produksie (binne vier jaar tot vyf jaar) en het ’n hoë uitdoppersentasie (meer as 60). Onder die nadele is dat die bome swak mikke, swak weerstand teen skurfsiekte en ’n hoë sinkbehoefte het.
■ Western Schley. Dié kultivar lewer ’n opbrengs van sowat 1,8 ton/ha en het goeie weerstand teen sinktekorte, ’n goeie raamwerk met sterk mikke en ’n hoë verdraagsaamheid teen koue. Die uitdoppersentasie beloop sowat 58. Omdat dit swak weerstand teen skurfsiekte het, behoort aanplantings tot die westelike en droër dele van die binneland beperk te word.
■ Choctaw. Hierdie kultivar vaar goed in feitlik enige verbouingstreek. Die neut is groot en mooi. Die kern verteenwoordig 58% van die totale gewig van die neut, is baie glad, ryk aan olie, helder in kleur en geurig. Die boom se regop groeiwyse maak dit ideaal vir die agterplaas en kommersiële aanplantings. Dit het goeie weerstand teen skurfsiekte.
■ Navaho. Die uitdoppersentasie van dié kultivar is 61. Die neut is goud- tot ligbruin met diep, smal, betreklik dorsale groewe en is prominent basaal en gesplete. Die bome groei welig, lewer ’n goeie opbrengs en het
goeie mikke. Dit begin vroeg in die lente groei, maar is vatbaar vir skurfsiekte.