VEREISTES VIR PEKANNEUTE

Klimaatsvereistes. Pekanneutbome vaar goed in gebiede met kort, koue winters en lang, warm somers. Die gemiddelde maksimum temperatuur moet hoër as 28 °C in die somer wees en laer as 23 °C in die winter. Die gemiddelde minimum temperatuur in die somer moet hoër as 16 °C wees en in die winter laer as 8 °C. Lae temperature en selfs ryp van Junie tot Augustus word vir suksesvolle bot- en blomvorming vereis. Dit moenie van Oktober tot April ryp nie. Van Oktober tot April vereis die boom hoë temperature vir vruggroei. Volgens die temperatuurvereistes is Cradock is uiters geskik daarvoor. Grondvereistes. Bome groei die beste in vrugbare, goed gedreineerde en diep leemgrond met ’n los tot mediumtekstuur. Pekanneute hou nie van ’n vlak watertafel nie, aangesien dit worteldiepte beperk. Die voorkoms van ondeurlaatbare lae vir water sal dreinering beperk, terwyl deurlugting baie belangrik is vir wortelontwikkeling. Kunsmis en mikro-elemente. Neem grondmonsters op verskillende plekke in die blok voor die vestiging van die bome, en vul tekorte aan. Sink word veral by jong, nie-draende bome as een van die belangrikste elemente beskou, spesifiek vir maksimum blaarontwikkeling.

By draende bome moet sink met waterbespuiting toegedien word wanneer die blaarbloeisels 50 mm lank is. Dit kan drie keer met tussenposes van twee weke tot drie weke herhaal word. Gereelde blaarontledings en die aanvul van voedingstowwe waar tekorte bestaan, kan voordelig wees om ’n goeie oes te verseker. Goldsuite se Crofft-kunsmis en verskeie mikro-elemente kan help om gesonde boomgroei te verseker. Besproeiing. In die meeste dele van SuidAfrika is die reënval nie voldoende om in die waterbehoeftes van pekanneutbome te voorsien en optimale produksie te verseker nie. Vir ’n goeie produk en hoë produksie is besproeiing noodsaaklik. Kennis oor die fisieke eienskappe en waterhouvermoë van die grond is nodig om ’n besproeiingsprogram te beplan.