‘MAAK WYNBEDRYF IETS OM OP TROTS TE WEES’
OP die 358ste herdenking van die eerste pars in Suid-Afrika het dr. Ernest Messina, voorsitter van Groot Constantia, dit die wynbedryf op die hart gedruk om ’n agent vir verandering te raak en die bedryf te help vorm tot iets waarop alle Suid-Afrikaners trots kan wees.
Jan van Riebeeck het op 2 Februarie 1659 in sy dagboek geskryf: “Prys die Heer, vandag is daar vir die eerste keer wyn gemaak van Kaapse druiwe.” Die afgelope ses jaar word daar op dié dag’ n herdenkings geleentheid gehou op Groot Constantia, waar die eerste oes ingesamel is. Die nuwe oes word terselfdertyd ingeseën. Messina meen landgenote buite die wynbedryf moet bewus gemaak word van die omvangryke historiese, maatskaplike en ekonomiese invloed wat die bedryf het.
“Die wynbedryf soos ons dit ken, was nie altyd glansryk en sonder omstredenheid nie, maaras’ n bedryf i son sop’ n rei som groter geloofwaardigheid en integriteit op te bou .”
Een van die doelwitte is om die bedryf meer verteenwoordigend te maak sodat dit die demografie in Suid-Afrika weerspieël.
“Ons, as bedryfsleiers en verbruikers, moet ons deel doen om daardie ideaal te bereik, want tyd is nie noodwendig aan ons kant nie.”
Messina het vertel van ’n bottel 1821 Grand Constance – ’n wyn wat Napoleon en ander bekendes oor die hele wêreld geniet het – wat in September weer sy pad tot op Groot Constantia gevind het. Die wyn is in die Cloete-kelder op die plaas gemaak.
“Die storie is deel van ons erfenis; ’n erfenis wat die bedryf moet beskerm, vertroetel en bevorder. Ons moet waak teen diegene wat op die teenoorgestelde wil aanspraak maak. Sulke stappe sal die beeld en integriteit van ons bedryf besmet en benadeel.”
Hy sê daar is dikwels verskillende weergawes van ’n storie, maar die waarheid moet gesoek en verkondig word.
“Die stories wat ons aan die huidige generasie gaan vertel, sal hul oortuigings en ook hul optrede beïnvloed. Só kan opvattings, houdings en mites vir ’n lang tyd voortleef.”
Wynboere en ander belanghebbendes het dus ’n verantwoordelikheid om hul landgenote bewus te maak van die bedryf, sy erfenis en sy stories.
–